अंबप (हातकणंगले):
अंबप ता. हातकणंगले येथील श्री बाळासाहेब माने शिक्षण प्रसारक मंडळ संचलित अंबप गर्ल्स हायस्कूलमध्ये संस्कार शिबिर अंतर्गत ‘मातृ-पितृ कृतज्ञता सोहळा’ मोठ्या उत्साहात आणि भक्तीमय वातावरणात पार पडला. या कार्यक्रमाच्या अध्यक्षस्थानी जे. टी. करंबाळे सर होते. कार्यक्रमाच्या सुरुवातीला शाळेत उपस्थित असलेल्या सर्व पालकांचे विद्यार्थिनींनी औक्षण करून पारंपरिक पद्धतीने स्वागत केले.
प्रास्ताविक करताना उत्तम पाटील सर यांनी पालकांना मार्गदर्शन केले. ते म्हणाले की, विद्यार्थ्यांना अतिप्रमाणात मोबाईल देऊ नका, कारण मोबाईलचे दुष्परिणाम वाईट आहेत. त्याचबरोबर, घरामध्ये मिळणाऱ्या संस्कारांवरही विद्यार्थ्यांची प्रगती अवलंबून असते. अनेक मार्गांनी मुले यशस्वी होतात; त्यांच्या मनावर दडपण आणू नये, त्यांना अभ्यास करताना मोकळीक द्यावी. विद्यार्थ्यांमध्ये वाढलेल्या आत्महत्यांच्या प्रमाणावर चिंता व्यक्त करत, मुलांना मनाला लागेल असे शब्द वापरू नयेत, असे आवाहन त्यांनी केले. शेवटी ते म्हणाले की, जेव्हा तुमचा पाल्य तुमचे चरण स्पर्श करतो, त्यावेळी त्याला चांगली भावना प्राप्त होते आणि हीच जीवनातील आदर्श भेट ठरणार आहे.
पत्रकार प्रकाश कांबळे यांनी या सोहळ्याचे महत्त्व विशद करताना सांगितले की, संस्कार शिबिरांअंतर्गत संपन्न झालेल्या या मातृ-पितृ कृतज्ञता सोहळ्यामुळे विद्यार्थी आणि पालक यांचे नाते अधिक दृढ बनते. विद्यार्थ्याने आई-वडिलांचे चरण स्पर्श केल्यानंतर त्याच्या मनामध्ये जी जाणीव निर्माण होते, ती भावना मनामध्ये यायला पाहिजे. आपल्या मुलांची सर्व जबाबदारी फक्त शिक्षकांवर न सोपवता, पालकांनीही आपल्या मुलांकडे लक्ष दिले पाहिजे, असे आवाहन त्यांनी केले.
मुख्याध्यापक जे. टी. करंबाळे सर यांनी बोलताना म्हटले की, कुंभार जसा चिखलाला आकार देतो, तसेच आम्ही विद्यार्थ्याला आकार देण्याचे काम करतो. विद्यार्थ्यांकडे पालकांनी थोडे लक्ष दिले पाहिजे. गुरुपौर्णिमेच्या निमित्ताने विद्यार्थ्यांचे पहिले गुरु आई-वडीलच आहेत, हे त्यांनी सांगितले. “आई माझा गुरु, आई कल्पतरू, सौख्याचा सागरु आई माझी, प्रीतीचे माहेर अमृताची धार मांगल्याचे सार आई माझी” या कवितेतून त्यांनी विद्यार्थ्यांना मंत्रमुग्ध केले.
यावेळी शिक्षक प्रताप पवार आणि पालक सौ. शिवानी मोरे यांनीही आपले मनोगत व्यक्त केले. पाचवी ते सातवीच्या विद्यार्थिनींनी आपल्या आई-वडिलांचे पाद्यपूजन करून त्यांचे आशीर्वाद घेतले. यावेळी सौ. नसरीन शिकलगार मॅडम, सौ. रंजना होलवान मॅडम, पद्मावती पाटील मॅडम, दरवाजकर मॅडम, बजरंग पाटील सर यांच्यासह पालक, शिक्षक आणि कर्मचारी वर्ग मोठ्या संख्येने उपस्थित होता. कार्यक्रमाचे स्वागत व प्रास्ताविक उत्तम पाटील सर यांनी केले, तर आभार सौ. मीना चौगुले मॅडम यांनी मानले.
प्रतीनिधी किशोर जासूद
एनटीव्ही न्यूज मराठी – कोल्हापूर