- बीड दौऱ्यावर असताना ताफ्यातील अग्निशमन दलाच्या गाडीने दुचाकीला दिली होती धडक.
- कुसुम विष्णू सुदे (वय ३०) या महिलेचा उपचारादरम्यान मृत्यू.
- तेलगाव–धारूर महामार्गावरील धूनकवड फाटा येथे घडला होता अपघात.
- अपघातात पती आणि दोन लहान मुली देखील गंभीर जखमी.
उपमुख्यमंत्री अजित पवार यांच्या बीड जिल्ह्याच्या दौऱ्यादरम्यान त्यांच्या ताफ्यातील अग्निशमन दलाच्या गाडीने धडक दिलेल्या एका महिलेचा उपचारादरम्यान मृत्यू झाला आहे. कुसुम विष्णू सुदे (वय ३०) असे मृत महिलेचे नाव असून, या घटनेमुळे ताफ्यातील वाहनांच्या वेगावर आणि सुरक्षिततेच्या नियमांवर पुन्हा एकदा मोठे प्रश्नचिन्ह उभे राहिले आहे.
ही दुर्घटना उपमुख्यमंत्री अजित पवार परतूरहून औसा येथे एका प्रचारसभेसाठी जात असताना तेलगाव–धारूर महामार्गावरील धूनकवड फाटा येथे घडली होती. ताफ्यातील अग्निशमन दलाच्या गाडीने विष्णू सुदे यांच्या दुचाकीला जोरदार धडक दिली. ही धडक इतकी भीषण होती की, दुचाकीचा पूर्णपणे चक्काचूर झाला आणि सुदे पती-पत्नींसह त्यांच्या दोन लहान मुली, रागिणी (९) आणि अक्षरा (६), रस्त्यावर फेकल्या गेल्या. स्थानिकांनी तातडीने त्यांना रुग्णालयात दाखल केले. त्यांच्यावर लातूर येथील खासगी रुग्णालयात उपचार सुरू होते, मात्र आज उपचारादरम्यान गंभीर जखमी झालेल्या कुसुम सुदे यांची प्राणज्योत मालवली. या हृदयद्रावक घटनेमुळे सर्वत्र हळहळ व्यक्त होत असून, ताफ्यातील वाहनांच्या वेगावर नियंत्रण ठेवण्याची मागणी जोर धरू लागली आहे.
एनटीव्ही न्यूज मराठी, बीड.