AHILYNAGAR |
💥 वृद्धांच्या गळ्यातील दागिने हिसकावणारे चोर आणि सोनार जेरबंद! अहिल्यानगर स्थानिक गुन्हे शाखेची मोठी कारवाई

संगमनेर येथे वृद्धा महिलेच्या गळ्यातील सोन्याचे दागिने जबरदस्तीने चोरी करणाऱ्या आरोपींना अटक.

चोरीचा माल विकत घेणारा सोनारही पोलिसांच्या जाळ्यात.

मुख्य आरोपी अनिल बिरदवडे आणि सोनार ऋषिकेश ढाळे जेरबंद; दोन आरोपी अद्याप फरार.

अटक केलेल्या आरोपींवर पुणे जिल्ह्यात यापूर्वीही गंभीर गुन्हे दाखल.


अहिल्यानगर जिल्ह्यामध्ये स्थानिक गुन्हे शाखेने एक मोठी आणि महत्त्वपूर्ण कारवाई केली आहे. संगमनेर येथे एका वृद्ध महिलेच्या गळ्यातील सोन्याचे दागिने जबरदस्तीने हिसकावून चोरी करणाऱ्या दोन आरोपींपैकी एकाला आणि चोरीचे दागिने खरेदी करणाऱ्या एका सोनाराला स्थानिक गुन्हे शाखेने जेरबंद केले आहे. या कारवाईमुळे जबरी चोरीच्या गुन्ह्यांना आळा बसण्याची शक्यता आहे.

दिनांक २१ नोव्हेंबर २०२५ रोजी सकाळी साडेदहाच्या सुमारास संगमनेर येथील साळीवाडा, जेधे कॉलनी समोर गीता प्रोव्हिजन स्टोअरजवळ फिर्यादी गीताबाई मुरलीधर ठाणेकर (वय ८१ वर्षे) यांच्या गळ्यातील सोन्याचे दागिने मोटारसायकलवर आलेल्या दोन अज्ञात चोरट्यांनी बळजबरीने हिसकावून नेले होते. या घटनेनंतर संगमनेर शहर पोलीस ठाण्यात गुन्हा दाखल करण्यात आला होता. या गुन्ह्याची दखल घेत पोलीस अधीक्षक, अहिल्यानगर, श्री. सोमनाथ घार्गे यांनी स्थानिक गुन्हे शाखेचे पोलीस निरीक्षक श्री. किरणकुमार कबाडी यांना जबरी चोरीचे गुन्हे उघडकीस आणण्याचे निर्देश दिले होते.
त्यानुसार, पो.नि. किरणकुमार कबाडी यांनी पथक तयार करून तपास सुरू केला. गुन्ह्यातील आरोपींचा शोध घेत असताना, त्यांना माहिती मिळाली की सदर गुन्हा अनिल रघुनाथ बिरदवडे (रा. बांदलवाडी, गुणावाडी, ता. बारामती, जि. पुणे) याने त्याच्या साथीदारासह केला आहे. पोलिसांनी बारामती येथे जाऊन आरोपी अनिल बिरदवडे (वय ३७) याला ताब्यात घेतले. चौकशीदरम्यान, त्याने आपला साथीदार अशोक विश्वनाथ गंगावणे (रा. विठ्ठलवाडी, ता. बारामती, जि. पुणे) याच्यासोबत गुन्हा केल्याची कबुली दिली.
तसेच, चोरीचा मुद्देमाल सोनार ऋषिकेश योगेश ढाळे आणि त्याचा भाऊ यश योगेश ढाळे (दोघेही रा. तांदुळवाडी, वेस, बारामती, जि. पुणे) यांना विकल्याचेही त्याने सांगितले. पोलिसांनी ऋषिकेश योगेश ढाळे (वय २२) यालाही ताब्यात घेतले. तथापि, अशोक गंगावणे आणि यश ढाळे हे दोघे अद्याप फरार आहेत. अटक केलेल्या आरोपींविरुद्ध पुणे जिल्ह्यात यापूर्वीही विविध गंभीर गुन्हे दाखल असल्याची माहिती समोर आली आहे. पुढील तपास संगमनेर शहर पोलीस स्टेशन करत आहे.

एनटीव्ही न्यूज मराठी, अहिल्यानगर.