♦️ यावल नगर परिषदेची कौतुकास्पद मोहीम
♦️ भटक्या कुत्र्यांवर मानवीय पद्धतीने नियंत्रण
♦️ PETA आणि ABC नियमांचे पालन
♦️ नसबंदी, उपचार आणि लसीकरणाची व्यवस्था
♦️ कुत्र्यांना इजा न करता पकडण्याची प्रक्रिया
♦️ नागरिक आणि प्राण्यांमध्ये समतोल साधण्याचा प्रयत्न
JALGAON | यावल शहरातील भटक्या कुत्र्यांचा आणि नागरिकांसह लहान मुलांच्या अंगावर धावून भुंकणाऱ्या कुत्र्यांचा प्रश्न सोडवण्यासाठी यावल नगर परिषदेने कौतुकास्पद मोहीम सुरू केली आहे. Animal Birth Control (ABC) सेंटर आणि प्राणी हक्क संस्था PETA यांच्या नियमांचे पालन करत, भटक्या कुत्र्यांना कोणताही त्रास न देता मानवीय पद्धतीने ही मोहीम राबवली जात आहे.
यावल नगर परिषदेच्या या मोहिमेचे वैशिष्ट्य म्हणजे यात कोणत्याही प्रकारची क्रूरता केली जात नाही. कुत्र्यांना पकडण्यासाठी PETA ने सुचवलेल्या मानवीय पद्धतींचा वापर केला जात आहे. जाळी आणि हाताच्या लूपच्या साहाय्याने कुत्र्यांना कोणतीही इजा न होता पकडले जात असून, त्यांना मारहाण केली जात नाही.
पकडलेल्या प्रत्येक कुत्र्याचा फोटो, लिंग, तसेच तो कोणत्या वॉर्डातून आणि कोणत्या गल्लीमधून पकडण्यात आला, याची सविस्तर नोंद घेतली जात आहे.
यानंतर ABC सेंटरमध्ये पात्र पशुवैद्यकांकडून कुत्र्यांचे निर्जंतुकीकरण आणि शस्त्रक्रिया केली जाणार आहे. ओळख पटावी यासाठी त्यांच्या कानाचा कोपरा V आकारात कापला जाणार आहे. शस्त्रक्रियेनंतर कुत्र्यांना ३ ते ५ दिवस ABC सेंटरमध्ये ठेवण्यात येणार असून, त्यांना अँटिबायोटिक्स, खाण्याची व्यवस्था आणि अँटी-रेबीज लस दिली जाणार आहे.
कुत्रे पूर्णपणे बरे झाल्यानंतर त्यांना पुन्हा सन्मानाने त्याच परिसरात सोडले जाणार आहे, जेणेकरून त्यांच्या क्षेत्रात बदल होणार नाही. हा ABC Rules २०२३ मधील सर्वांत महत्त्वाचा नियम असल्याचे नमूद करण्यात आले आहे.
या मानवीय मोहिमेमुळे शहरातील नागरिकांनी नगर परिषदेचे अभिनंदन केले आहे. नसबंदीमुळे भविष्यात भटक्या कुत्र्यांची संख्या नैसर्गिकरीत्या कमी होण्यास मदत होणार असून, कुत्रे चावण्याच्या घटना आणि रेबीजचा धोकाही कमी होण्याची अपेक्षा व्यक्त केली जात आहे.
याबाबत यावल नगर परिषदेच्या लोकनियुक्त अध्यक्ष सौ. छायाताई पाटील यांनी प्रशासनाच्या वतीने माहिती देताना सांगितले की, कोणत्याही प्रकारची क्रूरता न करता शासनाच्या नियमानुसारच काम केले जात आहे. कुत्र्यांना त्रास देणे हा नगर परिषदेचा उद्देश नसून, नागरिक आणि मुक्या प्राण्यांमध्ये समतोल साधणे हे या मोहिमेचे उद्दिष्ट आहे.
एनटीव्ही न्यूज मराठी | यावल