उमरखेड नगरपरिषदेत ‘प्रोटोकॉल’चा भंग; सत्ताधाऱ्यांवर ‘भाऊशाही’चा विरोधकांचा आरोप..!

• भूमिपूजन कार्यक्रमात नगरसेवकांना डावलल्याने संताप..!
• विकासकामांच्या श्रेयावरून पेटला राजकीय वाद..!

उमरखेड प्रतिनिधी | दि: १८ मार्च २०२६

यवतमाळ: शहरातील प्रभाग क्रमांक १ मध्ये आयोजित विकासकामांच्या भूमिपूजन कार्यक्रमात शासकीय शिष्टाचाराचे (प्रोटोकॉल) उल्लंघन केल्याचा गंभीर आरोप करत विरोधी पक्षाच्या नगरसेवकांनी सत्ताधाऱ्यांवर जोरदार टीका केली आहे. नगरपरिषदेत सध्या ‘भाऊशाही’ सुरू असून लोकशाही मूल्यांना हरताळ फासला जात असल्याचे विरोधकांनी म्हटले आहे.

पत्रकार परिषदेत विरोधकांचा हल्लाबोल

सोमवारी (दि. १६) स्थानिक विश्रामगृह येथे भाजपच्या गटनेत्यांसह प्रमुख नगरसेवकांनी पत्रकार परिषद घेऊन प्रशासनाचा निषेध नोंदवला. यावेळी भाजप गटनेते विजय हरडपकर, नगरसेविका ज्योत्सना प्रतीक रुडे, करुणा कुबडे, नगरसेवक सुरेंद्र कोडगिरवार, गोपाल कलाने, अमोल तिवरंगकर, भास्कर साधू, स्वीकृत नगरसेवक ॲड. विजय गुजरे, जिल्हा सरचिटणीस महेश काळेश्वरकर, डॉ. प्रतीक रुडे व पुंडलिक कुबडे उपस्थित होते.

विरोधकांचे मुख्य आरोप:

• शिष्टाचाराचे उल्लंघन: भूमिपूजन कार्यक्रमाची माहिती संबंधित प्रभागातील नगरसेवक, नगरपरिषद प्रशासन किंवा स्थानिक आमदारांनाही देण्यात आली नाही.
• श्रेयवादाची लढाई: आमदार किसन वानखेडे आणि भाजप जिल्हा समन्वयक नितीन भुतडा यांच्या प्रयत्नातून मंजूर झालेल्या निधीच्या कामांचे श्रेय सत्ताधारी लाटत असल्याचा आरोप करण्यात आला.
• बहुमताचा गैरवापर: गेल्या तीन महिन्यांपासून मासिक सभांमध्ये विरोधी नगरसेवकांना विश्वासात न घेता केवळ बहुमताच्या जोरावर ठराव मंजूर केले जात आहेत.
• अर्थसंकल्पाचा पत्ता नाही: नगरपरिषदेचा चालू वर्षाचा अर्थसंकल्प अद्याप सादर का झाला नाही, असा प्रश्नही यावेळी उपस्थित करण्यात आला.

नागरी समस्यांकडे जाणीवपूर्वक दुर्लक्ष?

शहरातील मूलभूत प्रश्नांकडे नगरपरिषद प्रशासन दुर्लक्ष करत असल्याचे विरोधकांनी सांगितले. यामध्ये प्रामुख्याने:

• पाणीपुरवठा आणि ड्रेनेजची बिकट समस्या.
• अतिरिक्त कर आकारणी आणि घरकुल योजनेतील लाभार्थी निवडीतील पारदर्शकता.
• भटक्या कुत्र्यांचा वाढता उपद्रव आणि शहरातील स्वच्छतेचा बोजवारा.

महत्त्वाच्या चौकटी:

“भाऊंचा आदेश नसल्यास काम नाही?” नगरपरिषदेत जनहिताची कोणतीही कामे सांगितल्यास, “जोपर्यंत भाऊंचा आदेश येत नाही, तोपर्यंत काम करणार नाही,” असे उत्तर कर्मचाऱ्यांकडून दिले जाते. या ‘भाऊशाही’मुळे सर्वसामान्य नागरिकांची कामे रखडत असल्याचा आरोप विरोधकांनी केला.

“नगराध्यक्षा नाममात्र?” नगराध्यक्षांच्या केबिनमध्ये दोन स्वीकृत नगरसेवक बसून सर्व निर्णय घेतात. संपूर्ण नगरपरिषदेची यंत्रणा त्यांच्याच नियंत्रणाखाली चालत असून नगराध्यक्षा केवळ नाममात्र प्रमुख उरल्या आहेत, अशी टीकाही यावेळी करण्यात आली.

वृत्त संकलन: प्रतिनिधी ताहेर मिर्झा, उमरखेड, यवतमाळ.