जळगाव जिल्ह्यातील यावल तालुक्यातील दहिगाव परिसरात विहिरीवरील केबल वायर, स्टार्टर आणि इतर साहित्य चोरीच्या घटना वाढत असल्याने शेतकरी त्रस्त झाले आहेत. आधीच दुष्काळाच्या संकटाचा सामना करणाऱ्या शेतकऱ्यांना आता चोरट्यांच्या उपद्रवाचाही फटका बसत आहे.
यावल तालुक्यातील दहिगाव परिसरात विहिरीवरील केबल वायर, स्टार्टर आणि इतर साहित्य चोरणाऱ्या अज्ञात चोरट्यांनी हैदोस घातल्याचे चित्र आहे. या चोरीच्या घटनांमुळे शेतकरी त्रस्त झाले असून, पोलिसांत तक्रार देण्याबाबतही शेतकरी उदासीन असल्याचे सांगितले जात आहे.
मिळालेल्या माहितीनुसार, दहिगाव परिसरातील विरावली शिवारात तसेच देगाव येथील रहिवासी रवींद्र जीवराम पाटील यांची आठ हजार रुपये किमतीची १०० मीटर लांबीची सोलर वायर चोरीला गेली. तसेच किशोर वासुदेव पाटील यांचीही १०० मीटर वायर चोरट्यांनी चोरून नेली. काल, दिनांक २८ च्या रात्री ही घटना घडली असून, चोरीची नेमकी वेळ समजू शकलेली नाही. याशिवाय परिसरातील इतर शिवारांतही केबल वायर आणि साहित्य चोरीचे प्रकार वाढत असल्याचे सांगितले जात आहे.
शेतकऱ्यांच्या म्हणण्यानुसार, पोलिसांत तक्रार देण्यासाठी गेल्यानंतर वेळ लागतो आणि त्यात संपूर्ण दिवस जातो. तक्रार करूनही योग्य दखल घेतली जात नसल्याची भावना शेतकऱ्यांमधून व्यक्त होत आहे. त्यामुळे काही शेतकरी तक्रार देण्यासाठी पुढे येण्यास धजावत नसल्याचे सांगितले जाते.
आधीच दुष्काळामुळे आर्थिक अडचणीत असलेल्या शेतकऱ्यांना या चोरीच्या घटनांमुळे अतिरिक्त नुकसान सहन करावे लागत आहे. त्यामुळे संबंधित परिसरात पोलिसांनी नियमित गस्त घालावी, चोरीच्या घटनांना आळा घालावा आणि शेतकऱ्यांच्या तक्रारींची तातडीने दखल घ्यावी, अशी मागणी होत आहे.