बाळापूर विधानसभा मतदारसंघातील विकासकामांच्या निधीवरून आता राजकीय संघर्ष चांगलाच पेटला आहे. मुख्यमंत्री देवेंद्र फडणवीस यांनी मंजूर केलेल्या १० कोटी रुपयांच्या निधीला भाजपच्या स्थानिक आमदाराने आडकाठी आणल्याचा गंभीर आरोप उद्धवसेनेने केला आहे. यासोबतच संबंधित आमदाराच्या संपत्तीच्या चौकशीची मागणीही करण्यात आली आहे.

अकोला जिल्ह्यातील बाळापूर विधानसभा मतदारसंघात विकासकामांच्या निधीवरून राजकीय वाद निर्माण झाला आहे. केंद्र आणि राज्यातील सत्तेच्या बळावर स्वतःला विकासपुरुष म्हणवून घेणाऱ्या भाजपच्या स्थानिक आमदाराला सत्तेचा अहंकार चढल्याची टीका उद्धवसेनेचे बाळापूर तालुकाप्रमुख ज्ञानेश्वर म्हैसने यांनी गुरुवारी, १२ नोव्हेंबर रोजी केली.

बाळापूर मतदारसंघातील अनेक प्रमुख रस्त्यांची खड्ड्यांमुळे दुरवस्था झाली असून, अपघातांमध्ये शेतकरी आणि तरुणांचे बळी गेल्याचे म्हैसने यांनी सांगितले. या पार्श्वभूमीवर उद्धवसेनेचे उपनेते तथा आमदार नितीन देशमुख यांनी मुख्यमंत्री देवेंद्र फडणवीस यांच्याकडे रस्ते दुरुस्ती आणि विकासकामांसाठी १५० कोटी रुपयांच्या निधीची मागणी केली होती. तसेच केंद्रीय मंत्री नितीन गडकरी यांच्याकडेही ८५ कोटी रुपयांची मागणी करण्यात आली होती. त्यानंतर केंद्रीय मंत्र्यांनी १० कोटी रुपयांचा निधी मंजूर केला.

दरम्यान, मुख्यमंत्र्यांनी पहिल्या टप्प्यात रस्ते विकासासाठी १० कोटी रुपये मंजूर करताच भाजपच्या स्थानिक लोकप्रतिनिधींनी विरोध सुरू केल्याचा आरोप करण्यात आला. हा निधी रद्द करण्यासाठी भाजपच्या एका स्थानिक आमदाराने मुख्यमंत्र्यांच्या स्वीय सहाय्यकाला हाताशी धरून प्रयत्न केल्याचा दावा ज्ञानेश्वर म्हैसने यांनी केला.

या प्रकरणी आमदार नितीन देशमुख आणि मतदारसंघातील अनेक सरपंचांनी नागपूर खंडपीठात धाव घेतली. निधी रद्द करण्याच्या निर्णयाला स्थगिती मिळवल्यानंतर संबंधित भाजप आमदाराने नाराजी व्यक्त केल्याची टीकाही म्हैसने यांनी केली.

भाजपचा शेतकरीविरोधी चेहरा उघडल्याचा आरोप

आमदार नितीन देशमुख यांच्या शेतकरी आंदोलनाचा धसका घेत भाजपच्या संबंधित आमदाराने बाळापूर मतदारसंघातील विकासकामांच्या निधीला आडकाठी घातल्याचा आरोप ज्ञानेश्वर म्हैसने यांनी केला. या प्रकारामुळे भाजपच्या स्थानिक आमदाराचा शेतकरीविरोधी चेहरा उघड झाल्याचेही त्यांनी म्हटले.

विकास आराखड्याच्या माध्यमातून कोट्यवधींची लूट?

राज्य शासनाच्या निर्देशानुसार तपास यंत्रणांनी खोट्या तक्रारींच्या आधारे आमदार नितीन देशमुख यांची अनेकदा चौकशी केली; मात्र त्यातून काहीही निष्पन्न झाले नसल्याचा दावा म्हैसने यांनी केला.

दुसरीकडे, महापालिकेच्या विकास आराखड्याच्या माध्यमातून भाजपच्या आमदाराने शहरातील अनेक शेतकऱ्यांच्या शेतजमिनी आणि लेआउटमध्ये ग्रीन झोन, विद्युत सबस्टेशन आणि भाजी बाजाराचे आरक्षण निश्चित केले. हे आरक्षण हटवण्यासाठी मूळ मालकांकडून कोट्यवधी रुपये उकळल्याचा गंभीर आरोपही त्यांनी केला.

मुख्यमंत्र्यांकडे संपत्तीच्या चौकशीची मागणी

भाजपचे दिवंगत ज्येष्ठ आमदार गोवर्धन शर्मा यांच्या आशीर्वादामुळे संबंधित आमदार २०१४ च्या विधानसभा निवडणुकीत पहिल्यांदा निवडून आले. त्यानंतर सत्तेच्या १२ वर्षांच्या कालावधीत त्यांनी कोट्यवधींची संपत्ती जमा केल्याचा आरोप ज्ञानेश्वर म्हैसने यांनी केला.

मुंबईसह अकोला शहरातील मोक्याच्या ठिकाणी आलिशान व्यावसायिक संकुले उभारण्यात आल्याचे सांगत, मुख्यमंत्री देवेंद्र फडणवीस यांनी संबंधित आमदाराच्या संपत्तीची चौकशी करावी, अशी मागणी करणार असल्याचे म्हैसने यांनी नमूद केले.

Leave a Reply

Your email address will not be published. Required fields are marked *