जळगाव जिल्ह्यातील यावल तालुक्यातील चुंचाळे येथे श्री समर्थ सुकनाथबाबा मंदिराची यात्रा मोठ्या उत्साहात पार पडली. हजारो भाविकांच्या उपस्थितीत धार्मिक कार्यक्रमांसह महाप्रसादाचे आयोजन करण्यात आले. विशेष म्हणजे, या यात्रेतून सामाजिक सलोखा आणि एकात्मतेचा संदेशही देण्यात आला.
शनिवारी सकाळपासूनच चुंचाळे येथील श्री समर्थ सुकनाथबाबा मंदिर परिसरात भाविकांची मोठी गर्दी पाहायला मिळाली. यावल, रावेर, फैजपूर, भुसावळ आणि चोपडा परिसरातील हजारो भाविकांनी दर्शनासाठी हजेरी लावली.
पहाटेपासून मंदिरात अभिषेक, महापूजा, आरती, भजन आणि कीर्तन अशा धार्मिक कार्यक्रमांना सुरुवात झाली होती. मंदिराला फुलांची आकर्षक सजावट करण्यात आली होती, तर परिसरात भगव्या पताका फडकत होत्या. भक्तिगीतांच्या निनादाने संपूर्ण गाव भक्तिमय झाले होते.
सुकनाथबाबा मंदिर हे नवसाला पावणारे श्रद्धास्थान म्हणून परिसरात प्रसिद्ध आहे. मनोकामना पूर्ण झाल्याबद्दल अनेक भाविकांनी तुला, नारळ, फळे आणि खडीसाखर अर्पण केली. लहान मुलांपासून ज्येष्ठ नागरिकांपर्यंत सर्वांनी बाबांचे दर्शन घेतले.
यात्रेनिमित्त मंदिर ट्रस्ट आणि ग्रामस्थांच्या वतीने भव्य महाप्रसादाचे आयोजन करण्यात आले होते. हजारो भाविकांनी महाप्रसादाचा लाभ घेतला. महाप्रसाद वाटपासाठी तरुण कार्यकर्ते, महिला मंडळ आणि ग्रामस्थांनी विशेष परिश्रम घेतले. दर्शन आणि महाप्रसादाची व्यवस्था शिस्तबद्ध पद्धतीने करण्यात आली होती.
या मंदिराचे वैशिष्ट्य म्हणजे येथे सर्व जाती-धर्मांचे आणि सर्व स्तरांतील भाविक कोणताही भेदभाव न ठेवता एकत्र दर्शन घेतात आणि एकाच पंगतीत महाप्रसादाचा लाभ घेतात. त्यामुळे सुकनाथबाबा मंदिर धार्मिक सलोखा, बंधुभाव आणि सामाजिक एकात्मतेचे प्रतीक बनले आहे.
यात्रेनिमित्त चुंचाळे गावात उत्सवाचे वातावरण होते. गावातील दुकाने आणि स्टॉल्सवर भाविकांची गर्दी झाली होती. लहान मुलांसाठी खेळणी, मिठाई आणि फुलांची दुकाने थाटण्यात आली होती. यात्रा यशस्वी करण्यासाठी गावातील महिला आणि युवकांनी पुढाकार घेतला.
