- शालेय साहित्य वाटप कार्यक्रमावरून दोन गटात राडा; पाथर्डी तालुक्यात खळबळ..!
पाथर्डी प्रतिनिधी | दि. ०७ मार्च २०२६
पाथर्डी (अहिल्यानगर): अहिल्यानगर जिल्ह्यातील पाथर्डी तालुक्यातील चिचोंडी येथे शालेय कार्यक्रमानंतर दोन गटांमध्ये झालेल्या वादातून मारहाण आणि विनयभंगाच्या परस्परविरोधी तक्रारी दाखल झाल्या आहेत. या घटनेत चिचोंडीचे विद्यमान सरपंच श्रीकांत एकनाथ आटकर यांच्यासह ११ जणांविरुद्ध जीवघेणा हल्ला केल्याचा गुन्हा दाखल झाल्याने परिसरात तणावाचे वातावरण असून सर्वत्र या घटनेची चर्चा सुरू आहे.
फिर्याद १: लोखंडी रॉड आणि हॉकी स्टिकने जीवघेणा हल्ला
चिचोंडी शिराळ येथील भगवान अण्णा फुलमाळी यांनी दिलेल्या फिर्यादीनुसार:
- घटनेचे कारण: १ मार्च रोजी तिरमल वस्ती येथील जिल्हा परिषद शाळेत संगणक संच व शालेय साहित्य वाटपाचा कार्यक्रम आयोजित केला होता. “तू कोणाला विचारून कार्यक्रम घेतला?” असा जाब विचारत आरोपींनी वाद घातला.
- हल्ला: सुमारे ११ वाजण्याच्या सुमारास एकनाथ आटकर, सरपंच श्रीकांत आटकर यांच्यासह ११ जण लोखंडी रॉड, हॉकी स्टिक व लाकडी दांडके घेऊन घरी आले आणि मारहाण केली.
- दुसरा हल्ला: तक्रार देण्यासाठी जात असताना मांडवे गावाजवळ आरोपींनी बोलेरो आणि स्विफ्ट कार आडवी लावून पुन्हा हल्ला केला. या हल्ल्यात भगवान फुलमाळी व भास्कर आटकर यांचे पाय फ्रॅक्चर झाले असून त्यांच्यावर नगर येथील खाजगी रुग्णालयात शस्त्रक्रिया करण्यात आली आहे.
गुन्हा दाखल झालेले आरोपी: एकनाथ आटकर, सरपंच श्रीकांत आटकर, राहुल आटकर, योगेश आटकर, अनिल आटकर, बाबासाहेब आटकर, गुलाब फुलमाळी, काशीनाथ फुलमाळी, संदीप फुलमाळी, साहेबराव आटकर व भाऊसाहेब फुलमाळी.
फिर्याद २: विनयभंग आणि मारहाण
याच घटनेच्या संदर्भात रंजना संदीप फुलमाळी यांनी दुसरी फिर्याद दिली आहे:
- आरोप: शाळेतील कार्यक्रमादरम्यान भगवान फुलमाळी यांनी त्यांच्यासोबत गैरवर्तन केले. याबाबत पती संदीप फुलमाळी यांनी जाब विचारला असता भगवान फुलमाळी, करण फुलमाळी, भास्कर हाटकर व दीपक फुलमाळी यांनी पतीला मारहाण केली.
- विनयभंग: रंजना फुलमाळी भांडण सोडवण्यासाठी गेल्या असता त्यांना लाथाबुक्क्यांनी मारहाण करण्यात आली आणि भगवान फुलमाळी यांनी हात धरून लज्जा उत्पन्न होईल असे गैरवर्तन केले. तसेच झटापटीत गळ्यातील मणीमंगळसूत्र गहाळ झाल्याचे त्यांनी तक्रारीत म्हटले आहे.
घटनेला राजकीय वलय
या प्रकरणातील आरोपी आटकर कुटुंब हे पाथर्डी आणि नगर जिल्ह्याच्या राजकारणातील मोठे नाव आहे:
- श्रीकांत आटकर: विद्यमान सरपंच.
- एकनाथ आटकर: मिरी-तिसगाव प्रादेशिक नळ योजनेचे अध्यक्ष.
- राजकीय संबंध: हे कुटुंब माजी आमदार शिवाजीराव कर्डिले, अक्षय कर्डिले, माजी खासदार सुजय विखे पाटील आणि आमदार मोनिकाताई राजळे यांचे समर्थक म्हणून ओळखले जाते. त्यामुळे या गुन्ह्यामुळे राजकीय वर्तुळात मोठी खळबळ उडाली आहे.
या राजकीय पार्श्वभूमीमुळे आटकर कुटुंबावर गुन्हा दाखल झाल्यावर पाथर्डीच्या राजकीय व सामाजिक वर्तुळात चर्चेला उधाण आले आहे.
पोलीस तपास सुरू
पाथर्डी पोलीस ठाण्याचे पोलीस निरीक्षक विलास पुजारी यांच्या मार्गदर्शनाखाली पोलीस या प्रकरणाचा अधिक तपास करत आहेत. गावात तणाव पाहता पोलिसांनी योग्य ती खबरदारी घेतली आहे.
वृत्त संकलन: भिवसेन टेमकर, एनटीव्ही न्यूज मराठी, पाथर्डी, अहिल्यानगर.