- ‘पारंपारिक जागा शासकीय दरात मिळाव्यात’ अशी बाजारकरी व्यापारी संघटनेची मागणी..!
पाथर्डी प्रतिनिधी | दि. ०७ मार्च २०२६
पाथर्डी (अहिल्यानगर): अहिल्यानगर जिल्ह्यातील पाथर्डी तालुक्यात प्रसिद्ध असलेल्या श्री क्षेत्र मढी येथील यात्रा उत्सवामध्ये मागील तीन ते चार पिढ्यांपासून व्यवसाय करणाऱ्या व्यापाऱ्यांनी आता आक्रमक पवित्रा घेतला आहे. यात्रेतील व्यापाऱ्यांची होणारी आर्थिक लुटमार थांबवून त्यांना पारंपारिक जागा योग्य शासकीय दरात उपलब्ध करून द्याव्यात, अशी मागणी व्यापारी असोसिएशनने केली आहे. मागण्या मान्य न झाल्यास पुढील वर्षापासून मढी यात्रेवर बहिष्कार टाकण्याचा इशारा हिंदू व्यापाऱ्यांनी दिला आहे.
प्रशासनाला दिलेल्या निवेदनातील महत्त्वाचे मुद्दे
या संदर्भात प्रांताधिकारी प्रसाद मते व गटविकास अधिकारी संगीता पालवे यांना निवेदन देण्यात आले. निवेदनात व्यापाऱ्यांनी खालील समस्या मांडल्या आहेत:
- अतिक्रमण व दादागिरी: गावातील आणि परिसरातील लोक ठिकठिकाणी मर्जीप्रमाणे जागा पकडून, “ही जागा आमची आहे, इथे दुकान लावायचे असेल तर आम्हाला ठराविक रक्कम भाडे द्यावे लागेल,” असे सांगून व्यापाऱ्यांना धमकावत आहेत.
- दुहेरी आर्थिक फटका: एकीकडे स्थानिक लोकांकडून पैशांची मागणी होत असताना, दुसरीकडे ग्रामपंचायत देखील ‘यात्रा कर’च्या नावाखाली बाहेरील व्यापाऱ्यांकडून मनमानी रक्कम वसूल करत आहे.
- जागेची अडचण: वाढत्या अतिक्रमणामुळे जुन्या मिठाई आणि खाऊच्या व्यापाऱ्यांना दुकाने लावण्यासाठी मोठा त्रास सहन करावा लागत आहे.
निवेदनावर स्वाक्षरी असलेले व्यापारी व उपस्थित मान्यवर
या निवेदनावर संदीप काकडे, अनिल लाटे, सोमनाथ टेके, रमेश टेके, सुरेश काकडे, गणेश टेके, नागेश काकडे, लक्ष्मण कदम, श्रीकांत टेके, योगेश काकडे, शरद काळे, दत्ता दिनकर आदींच्या सह्या आहेत. यावेळी नगरसेवक देवा पवार, मनसेचे जिल्हाध्यक्ष अविनाश पालवे, तालुका अध्यक्ष संतोष जिरेसाळ उपस्थित होते.
“हिंदू व्यापारी देखील यात्रेवर बहिष्कार घालतील” – सोमनाथ टेके
“आम्ही मागील चार ते पाच पिढ्यांपासून मढी यात्रेत व्यवसाय करतो. मात्र, मागील दोन वर्षांपासून जागा मिळण्यास मोठ्या अडचणी येत आहेत. ग्रामपंचायतीकडून गैर-व्यावसायिक लोक नाममात्र पावती फाडून मोक्याच्या जागांवर ताबा मिळवतात आणि नंतर खऱ्या व्यापाऱ्यांकडून मोठी रक्कम वसूल करून त्यांना जागा विकतात. प्रशासनाने याची दखल घेतली नाही, तर पाथर्डी तालुक्यातील सर्व हिंदू व्यापारी बांधव पुढील वर्षी मढी यात्रेवर बहिष्कार घालतील.” — सोमनाथ टेके (अध्यक्ष, बाजारकरी व्यापारी संघटना, पाथर्डी)
व्यापाऱ्यांच्या या भूमिकेमुळे मढी यात्रा प्रशासनासमोर मोठे आव्हान उभे राहिले असून, आता प्रशासन यावर काय तोडगा काढते, याकडे सर्वांचे लक्ष लागले आहे.
वृत्त संकलन: भिवसेन टेमकर, एनटीव्ही न्यूज मराठी, पाथर्डी, अहिल्यानगर.