अहिल्यानगर शहरातील वाहतुकीच्या दृष्टीने अत्यंत महत्त्वाच्या असलेल्या डीएसपी चौकातील कोंडीचा प्रश्न आता कायमस्वरूपी मार्गी लागण्याच्या दिशेने महत्त्वाचे पाऊल पडले आहे. डीएसपी चौकात उड्डाणपूल उभारण्याच्या प्रकल्पासाठी ६५ कोटी रुपयांचा निधी मंजूर करण्यात आला असून, पालकमंत्री डॉ. राधाकृष्ण विखे पाटील, आमदार संग्राम जगताप आणि माजी खासदार डॉ. सुजय विखे पाटील यांच्या पाठपुराव्यामुळे या प्रकल्पाला गती मिळाली आहे.
कोपरगाव-शिर्डी-कोल्हार-अहिल्यानगर या प्रमुख मार्गावरील डीएसपी चौक हा शहरातील वाहतुकीचा महत्त्वाचा केंद्रबिंदू आहे. संभाजीनगरकडून येणारी तसेच शिर्डी, कोपरगाव, कोल्हार आणि शहराच्या विविध भागांकडे जाणारी वाहतूक या चौकातून मोठ्या प्रमाणावर होते.
वाढत्या वाहनसंख्येमुळे विशेषतः सकाळी आणि सायंकाळच्या गर्दीच्या वेळेत या ठिकाणी मोठी वाहतूक कोंडी होत होती. वाहनांच्या लांबच लांब रांगा लागत असल्याने नागरिकांचा वेळ, इंधन आणि श्रम खर्ची पडत होते. कर्मचारी, विद्यार्थी, व्यापारी, रुग्णवाहिका तसेच शहराबाहेर प्रवास करणाऱ्या नागरिकांना या समस्येचा दररोज सामना करावा लागत होता.
शहराचा विस्तार, वाढती लोकसंख्या आणि वाहनांची संख्या लक्षात घेऊन भविष्यातील वाहतुकीचा ताण कमी करण्यासाठी सक्षम पायाभूत सुविधा उभारण्याची गरज मांडण्यात आली होती. यासाठी माजी खासदार डॉ. सुजय विखे पाटील आणि आमदार संग्राम जगताप यांनी सातत्याने पाठपुरावा केला, तर पालकमंत्री डॉ. राधाकृष्ण विखे पाटील यांचे मार्गदर्शन व सहकार्य मिळाले.
डीएसपी चौकातील प्रस्तावित उड्डाणपुलासाठी सार्वजनिक बांधकाम विभागामार्फत ६५ कोटी रुपयांचा निधी मंजूर करण्यात आला आहे. त्यामुळे अनेक वर्षांपासून चर्चेत असलेल्या या प्रकल्पाला आता प्रत्यक्ष अंमलबजावणीची दिशा मिळाली आहे.
उड्डाणपूल पूर्ण झाल्यानंतर डीएसपी चौकातील मुख्य वाहतुकीवरील ताण कमी होण्यास मदत होणार असून, शिर्डी, कोपरगाव, कोल्हार तसेच अहिल्यानगर शहराच्या विविध भागांकडे जाणाऱ्या वाहनांना अधिक सुरळीत मार्ग उपलब्ध होणार आहे. परिणामी, चौकातील कोंडी कमी होऊन नागरिकांचा प्रवासाचा वेळ वाचण्यास मदत होईल.
अहिल्यानगर शहराचा वेगाने विस्तार होत असताना भविष्यातील वाहतूक व्यवस्थेचा विचार करून उभारला जाणारा हा उड्डाणपूल शहराच्या विकासाच्या दृष्टीने महत्त्वाचा प्रकल्प ठरणार आहे.
या प्रकल्पासाठी निधी मंजूर केल्याबद्दल मुख्यमंत्री देवेंद्र फडणवीस, उपमुख्यमंत्री एकनाथ शिंदे, उपमुख्यमंत्री सुनेत्रा पवार तसेच महायुती सरकारचे आभार व्यक्त करण्यात आले आहेत. शहराच्या वाढत्या गरजा आणि भविष्यातील वाहतुकीचा विचार करून शासनाने घेतलेला हा निर्णय अहिल्यानगरच्या विकासाला अधिक गती देणारा ठरेल, असा विश्वास डॉ. सुजय विखे पाटील यांनी व्यक्त केला.