अंबड, जालना: अंबड बस स्थानकासमोरील जालना-बीड रस्त्यावर पडलेल्या मोठ्या खड्ड्यामुळे प्रवाशांना मोठा मनस्ताप सहन करावा लागत आहे. या खड्ड्यामुळे बस स्थानकातून ये-जा करणाऱ्या वाहनांना रोज अपघात होत असून, अनेक दुचाकीस्वारांचे अपघात झाल्याचेही समोर आले आहे. गेल्या एक महिन्यापासून हा खड्डा तसाच असल्याने प्रवाशांनी डेपो व्यवस्थापकांकडे तातडीने दुरुस्तीची मागणी केली आहे.
अंबड बस स्थानक हे एक महत्त्वाचे केंद्र असून, येथे दररोज शेकडो वाहनांची वर्दळ असते. बस, कार आणि दुचाकी वाहने या खड्ड्यातून वाट काढत असताना मोठे नुकसान होत आहे. अनेकदा प्रवाशांना अडथळ्यांमुळे बस पकडणे कठीण होत आहे.
या समस्येबाबत प्रवाशांनी तीव्र नाराजी व्यक्त केली आहे. एका प्रवाशाने सांगितले की, “गेल्या महिन्याभरापासून हा खड्डा आहे, पण त्यावर काहीही उपाययोजना केली जात नाही. वाहनांचे नुकसान होत आहे आणि दुचाकीस्वारांचे अपघात होत आहेत. या खड्ड्यामुळे कोणाचा जीव गेल्यावरच अधिकारी जागे होणार का?”
प्रवाशांनी डेपो व्यवस्थापकांनी यावर तातडीने लक्ष घालून रस्त्याची दुरुस्ती करण्याची मागणी केली आहे. जर या समस्येवर लवकर तोडगा काढला नाही आणि भविष्यात काही अनुचित घटना घडली तर त्याला जबाबदार कोण, असा प्रश्नही प्रवाशांनी विचारला आहे.
न्यूज रिपोर्टर: अशोक खरात अंबड, जिल्हा जालना मो. ९८२२१६१६३१