जालना: जाफराबाद तालुक्यातील सिद्धार्थ महाविद्यालय जाफराबाद येथे दिनांक २४ सप्टेंबर 2025 रोजी ‘राष्ट्रीय सेवा योजना दिवस’ आणि ‘वाङमय मंडळाचे उद्घाटन कार्यक्रम’ मोठ्या उत्साहात पार पडला. राष्ट्रीय सेवा योजना विभाग व वाङमय मंडळ यांच्या संयुक्त विद्यमाने आयोजित या कार्यक्रमाच्या अध्यक्षस्थानी महाविद्यालयाचे प्राचार्य डॉ. र.तु. देशमुख हे होते. मोरेश्वर महाविद्यालय, भोकरदन येथील उपप्राचार्य प्रो. डॉ. गोवर्धन मुळक यांनी प्रमुख मार्गदर्शक म्हणून उपस्थिती लावली. तसेच, उपप्राचार्य डॉ.प्रो. सुनील मेढे, डॉ.श्याम सर्जे आणि प्रा. विनोद हिवराळे यांचीही प्रमुख उपस्थिती होती.
प्रो. डॉ. गोवर्धन मुळक यांच्या हस्ते कार्यक्रमाचे उद्घाटन करण्यात आले. यावेळी विद्यार्थ्यांना मार्गदर्शन करताना प्रो. डॉ. मुळक म्हणाले की, राष्ट्रीय सेवा योजनेमुळे विद्यार्थ्यांचा सर्वांगीण विकास होतो आणि ते सर्वगुणसंपन्न नागरिक बनतात. यामुळे समाजाचा आणि देशाचा विकास होण्यास हातभार लागतो. तसेच, वाङमय मंडळामुळे विद्यार्थ्यांच्या सुप्त गुणांना वाव मिळतो. त्यांनी “आजची महाविद्यालयीन दशा व विद्यार्थी” आणि “आईचे उपकार” या कविता सादर करून विद्यार्थ्यांची मनं जिंकली.
प्राचार्य डॉ. र.तु. देशमुख यांनी आपल्या अध्यक्षीय भाषणात विद्यार्थ्यांना राष्ट्रीय सेवा योजना, वाङमय मंडळ आणि महाविद्यालयातील इतर उपक्रमांमध्ये सहभागी होण्याचे आवाहन केले. ते म्हणाले की, या संधींचा लाभ घेऊन विद्यार्थी जीवनाचा मनसोक्त आस्वाद घेऊ शकतात आणि महाविद्यालयाचे व समाजाचे नाव उज्वल करू शकतात.
कार्यक्रमात अकरावी, बारावी, बी.ए., बी.कॉम. आणि बी.एस्सी प्रथम, द्वितीय व तृतीय वर्षाच्या विद्यार्थ्यांनी तयार केलेल्या भित्तिपत्रकांचेही उद्घाटन करण्यात आले. कार्यक्रमाचे सूत्रसंचालन हिंदी विभागाचे प्रा. डॉ. सुदाम पाटील यांनी केले, तर प्रास्ताविक राष्ट्रीय सेवा योजनेचे कार्यक्रम अधिकारी प्रा. डॉ. शिवाजी जगतवाड यांनी सादर केले. प्रा. डॉ. प्रदीप मिसाळ यांनी आभार प्रदर्शन केले.
कार्यक्रमाच्या यशस्वीतेसाठी राष्ट्रीय सेवा योजनेच्या कार्यक्रम अधिकारी प्रा. श्रीमती सरिता मणियार, मराठी, हिंदी आणि इंग्रजी विभागाचे प्राध्यापक आणि वाङमय मंडळाच्या सदस्यांनी विशेष परिश्रम घेतले. कार्यक्रमाचा समारोप राष्ट्रगीताने झाला. राष्ट्रीय सेवा योजना दिनाचे औचित्य साधून प्रमुख पाहुणे, प्राचार्य, प्राध्यापक, शिक्षकेतर कर्मचारी आणि विद्यार्थ्यांनी महाविद्यालयाच्या परिसरात वृक्षारोपण केले. यावेळी विद्यार्थी, स्वयंसेवक आणि कर्मचारी मोठ्या संख्येने उपस्थित होते.
प्रतिनिधी राहुल गवई,
एनटीव्ही न्यूज मराठी, जाफराबाद, जालना.