नळदुर्गचे लोकप्रिय भूमिपुत्र अशोक जगदाळे महाविकास आघाडीतून नगराध्यक्षपदासाठी सज्ज, विरोधकांना तगडे आव्हान..!

• “नळदुर्गचा कायापालट हेच ध्येय..!” – अशोक जगदाळे

नळदुर्ग, दि. 18 ऑक्टोबर: महाविकास आघाडीचे नेते आणि नळदुर्गचे लोकप्रिय भूमिपुत्र अशोक जगदाळे यांनी आगामी नळदुर्ग नगरपालिका निवडणुकीत पूर्ण ताकदीने रिंगणात उतरण्याचा निर्धार केला आहे. नळदुर्गचा सर्वांगीण विकास हेच आपले एकमेव ध्येय असल्याचे त्यांनी स्पष्ट केले असून, नगराध्यक्षपदासाठी निवडणूक लढवण्याची जनतेतून होत असलेली जोरदार मागणी त्यांनी मान्य केली आहे.

एन टीव्ही न्यूज मराठीशी बोलताना जगदाळे यांनी सांगितले की, “गेल्या अनेक वर्षांपासून नळदुर्गच्या जनतेने माझ्यावर जो विश्वास दाखवला, त्या विश्वासाचं सोनं करत शहराच्या विकासासाठी काम केलं आहे. यंदा पुन्हा एकदा नळदुर्गचा कायापालट करण्यासाठी मी मैदानात उतरलो आहे.”

विकासाचं ‘सिक्स-पॉइंट’ व्हिजन

अशोक जगदाळे यांनी नळदुर्गच्या भविष्यासाठी एक ठोस आणि वास्तववादी विकासाचं व्हिजन मांडलं आहे, ज्यामध्ये सहा प्रमुख मुद्द्यांवर लक्ष केंद्रित करण्यात आले आहे:

1. मूलभूत विकास: पाणीपुरवठा, रस्ते, ड्रेनेज आणि प्रकाश व्यवस्था सुधारणे.
2. स्मार्ट नळदुर्ग: शहर स्वच्छ, सुरक्षित आणि डिजिटल सुविधांनी युक्त करणे.
3. पर्यटन विकास: ऐतिहासिक नळदुर्ग किल्ला व धार्मिक स्थळांना जागतिक स्तरावर आणणे.
4. युवकांसाठी रोजगार: लघुउद्योग, प्रशिक्षण केंद्र आणि स्वयंरोजगार प्रोत्साहन.
5. महिला सक्षमीकरण: महिला बचतगटांना आर्थिक सहाय्य व स्वावलंबन कार्यक्रम.
6. शिक्षण-आरोग्य सुधारणा: आरोग्य केंद्रांचा दर्जा वाढवणे आणि डिजिटल शिक्षणसुविधा सुरू करणे.

जनतेची प्रबळ मागणी आणि ‘नगराध्यक्ष’ शर्यत

नळदुर्ग शहर आणि आसपासच्या भागातील नागरिक, कार्यकर्ते आणि समर्थक एकमुखाने अशोक जगदाळे यांनी नगराध्यक्षपदासाठी निवडणूक लढवावी, अशी मागणी करत आहेत. “जर अशोक जगदाळे मैदानात उतरले, तर विरोधकांचे चारी मुंड्या चीत होतील!” असा विश्वास जनतेकडून व्यक्त होत आहे. जगदाळे यांच्या समर्थनात “पुन्हा एकदा जगदाळे साहेब!” असा जयघोष शहरभर घुमत आहे.

जगदाळे यांनी विरोधकांवरही टीका केली. ते म्हणाले, “विकास कसा करायचा हे आम्ही दाखवून दिलं आहे. विरोधक केवळ टीका करतात, पण काम करत नाहीत. आता पुन्हा शहराचा कायापालट करून दाखवू.”

विकास विरुद्ध भ्रष्टाचार: निर्णायक लढत

महाविकास आघाडीच्या नेतृत्वाखालील ही निवडणूक “विकास विरुद्ध भ्रष्टाचार” या मुख्य मुद्द्यावर लढवली जाणार असल्याची चिन्हे स्पष्ट आहेत. “जनता ही विकासाच्या बाजूने आहे आणि भ्रष्टाचाराविरुद्ध उभी आहे,” असा ठाम विश्वास अशोक जगदाळे यांनी व्यक्त केला आहे. नळदुर्गच्या भविष्यासाठी ही लढत निर्णायक ठरणार आहे.

—————–

प्रतिनिधी आयुब शेख,

एनटीव्ही न्यूज मराठी, नळदुर्ग, धाराशीव.