पाथर्डी पोलिसांची मोठी कारवाई; खांडगाव रस्ता लुटीतील फरार आरोपीच्या मुसक्या आवळल्या..!

• कासार पिंपळगाव शिवारात फिल्मी स्टाईल पाठलाग..!

पाथर्डी प्रतिनिधी | दि. ०३ फेब्रुवारी

अहिल्यानगर: अहिल्यानगर जिल्ह्यातील पाथर्डी तालुक्यातील खांडगाव रस्ता लुटीच्या घटनेने संपूर्ण जिल्हा हादरला होता. या गुन्ह्यातील फरार असलेल्या एका सराईत गुन्हेगाराला जेरबंद करण्यात पाथर्डी पोलिसांना यश आले आहे. २ फेब्रुवारी २०२६ रोजी कासार पिंपळगाव शिवारात पोलिसांनी सापळा रचून या आरोपीला अटक केली.

नेमकी घटना काय होती?

३१ ऑक्टोबर २०२५ रोजी रात्री १० वाजेच्या सुमारास त्रिभुवनवाडी ते खांडगाव रोडवर एका ट्रॅव्हल्सला पांढऱ्या रंगाच्या स्विफ्ट कारने अडवले होते. ५ ते ६ चोरट्यांनी गावठी पिस्तूल आणि चाकूचा धाक दाखवून प्रवाशांना जीवे मारण्याची धमकी दिली आणि त्यांच्याकडील सोन्याचे दागिने व रोख रक्कम लुटून नेली होती. याप्रकरणी पवन सुखदेव खैरनार (रा. नाशिक) यांच्या फिर्यादीवरून पाथर्डी पोलीस ठाण्यात दरोड्याचा गुन्हा दाखल करण्यात आला होता.

असा झाला आरोपीचा थरारक पाठलाग

या गुन्ह्यातील १० आरोपींना पोलिसांनी आधीच अटक केली होती, मात्र दोन आरोपी फरार होते. २ फेब्रुवारी रोजी पोलिसांना माहिती मिळाली की, एक फरार आरोपी कासार पिंपळगाव शिवारात आला आहे.

• माहिती मिळताच पाथर्डी पोलिसांच्या पथकाने हनुमान टाकळी ते जवखेडे रोडवर धाव घेतली.
• पोलिसांची चाहूल लागताच आरोपीने पळ काढण्याचा प्रयत्न केला.
• मात्र, पोलिसांनी शिताफीने पाठलाग करून त्याला रंगेहाथ पकडले.

आरोपीची ओळख आणि गुन्हेगारी पार्श्वभूमी

अटक करण्यात आलेल्या आरोपीचे नाव आकाश उर्फ गुल्या अनिल वांढेकर (वय २३, रा. मोहोज खुर्द, ता. पाथर्डी) असे आहे. सखोल चौकशीत त्याने खांडगाव येथील दरोड्याची कबुली दिली आहे. तपासात असेही निष्पन्न झाले की, यापूर्वीही त्याच्यावर पाथर्डी पोलीस ठाण्यात चोरी आणि दरोड्याचे अनेक गंभीर गुन्हे दाखल आहेत.

कारवाई करणारे पोलीस पथक

ही यशस्वी कारवाई जिल्हा पोलीस अधीक्षक सोमनाथ घार्गे, अप्पर पोलीस अधीक्षक वैभव कलबुर्मे, आणि उपविभागीय पोलीस अधिकारी निरज राजगुरू यांच्या मार्गदर्शनाखाली खालील पथकाने केली:

• विलास पुजारी (पोलीस निरीक्षक, पाथर्डी)
• नितीन दराडे (सहा. पोलीस उपनिरीक्षक)
• बाबासाहेब बडे, ज्ञानेश्वर ईलग, संजय जाधव, सागर बुधवंत आणि रविंद्र चव्हाण.

पाथर्डी पोलिसांच्या या धडाकेबाज कारवाईमुळे रस्ता लुट करणाऱ्या टोळ्यांचे धाबे दणाणले आहेत. या प्रकरणातील अन्य आरोपींचा शोध आणि पुढील कायदेशीर प्रक्रिया आता वेगाने सुरू आहे.

प्रतिनिधी भिवसेन टेमकर, पाथर्डी, अहिल्यानगर.