- ४४,००० रुपये नगदी आणि मोबाईल हस्तगत..!
- सीसीटीव्ही फुटेज आणि तांत्रिक तपासाच्या आधारे आरोपी जेरबंद..!
वाशिम प्रतिनिधी | दि: २४ मार्च २०२६
वाशिम: वाशिम जिल्ह्यातील मानोरा येथील एका कापड दुकानात खरेदीसाठी आलेल्या महिलेची पर्स कापून ४४ हजार रुपये लांबवणाऱ्या महिला चोरटीला स्थानिक गुन्हे शाखेने (LCB) मोठ्या शिताफीने अटक केली आहे. अवघ्या काही तासांतच या गुन्ह्याचा छडा लावून पोलिसांनी मुद्देमाल हस्तगत केला आहे.
घटनेची पार्श्वभूमी
२३ मार्च २०२६ रोजी फिर्यादी सौ. सुरेखा शालीक लिंबोळे (रा. भुली, ता. मानोरा) ह्या मानोरा येथील ‘चुन्नु मुन्नु’ कापड दुकानात खरेदीसाठी गेल्या होत्या. गर्दीचा फायदा घेऊन एका अज्ञात महिलेने त्यांच्या पर्समधील ४४,००० रुपये नगदी आणि एक मोबाईल चोरून नेला. याप्रकरणी मानोरा पोलीस ठाण्यात कलम ३०३(२) भा.न्या.सं. अन्वये गुन्हा दाखल करण्यात आला होता.
तपासाचे चक्र आणि धाडसी कारवाई
गुन्ह्याचे गांभीर्य ओळखून स्थानिक गुन्हे शाखेचे पोलीस निरीक्षक प्रदीप परदेशी यांनी तातडीने एक पथक तयार करून मानोरा येथे रवाना केले.
- सीसीटीव्ही आणि माहिती: घटनास्थळावरील आणि शहरातील सीसीटीव्ही फुटेज तपासले असता, संशयित महिला वाशिमकडे जात असल्याची गोपनीय माहिती मिळाली.
- वाशिममध्ये सापळा: एलसीबीचे पथक तात्काळ वाशिम शहरात दाखल झाले आणि सिव्हिल लाईन परिसरात शोध सुरू केला. संशयित महिला दिसताच तिला महिला पोलीस अंमलदारांच्या मदतीने ताब्यात घेतले.
आरोपीची कबुली आणि मुद्देमाल जप्त
अटक करण्यात आलेल्या महिलेचे नाव सौ. रोहिणी उर्फ शितल भास्कर शिंदे (वय २५ वर्षे, रा. नालंदा नगर, वाशिम) असे आहे. तिने आपल्या लहान मुलासह मानोरा येथील दुकानात चोरी केल्याची कबुली दिली.
- जप्त मुद्देमाल: ४४,००० रुपये नगदी आणि चोरलेला मोबाईल पोलिसांनी तिच्याकडून हस्तगत केला आहे.
आरोपी महिलेला पुढील चौकशीसाठी मानोरा पोलिसांच्या ताब्यात देण्यात आले असून, तिने जिल्ह्यात आणखी कुठे अशा चोऱ्या केल्या आहेत का, याचा सखोल तपास सुरू आहे.
पोलीस पथकाचे अभिनंदन
ही यशस्वी कारवाई पोलीस अधीक्षक अनुज तारे, अपर पोलीस अधीक्षक श्रीमती लता फड यांच्या मार्गदर्शनाखाली खालील पथकाने केली:
- प्रदीप परदेशी (पोलीस निरीक्षक, एलसीबी वाशिम)
- सपोनि योगेश धोत्रे आणि एलसीबीची विशेष टीम.
वृत्त संकलन: प्रतिनिधी फुलचंद भगत, वाशिम.