लातूर : पोलिस भरतीच्या तयारीसाठी व्यायाम करताना दोन तरूणाला भरधाव वेगातील कारने चिरडले एकाचा जागीच मृत्यू तर दुसरा गंभीर जखमी झाल्याची घटना अहमदपूर अंबाजोगाई महामार्गावर दगडवाडी येथे घडली आहे. अहमदपूर तालुक्यातील दगडवाडी येथील दोन युवक नेहमीप्रमाणे पोलीस भरतीसाठी रस्त्याच्या कडेला बसून व्यायाम करत होते. यावेळी भरधाव वेगातील कारची या युवकांना धडक बसली यात एकजण जागीच ठार झाला तर दुसरा गंभीर जखमी झाल्याची घटना घडली आहे
मिळालेल्या माहितीनुसार ही दुर्दैवी घटना रविवारी सकाळी सहा वाजताच्या सुमारास दगडवाडी येथे घडली आहे. दगडवाडी येथील रहिवासी असलेला मयत मुकुंद रामराव मुंढे वय 24 व प्रतिक पांडूरंग मुंढे 21 हे दोघे वर्गमित्र होते. ते पोलीस भरतीसाठी दररोज पहाटे व्यायाम करीत होते. मुकुंद मुंढे डी फार्मसी झाल्याने एका मेडिकल दुकानात काम करीत होता. तर प्रतिक मुंढे याची आसाम रायफल मध्ये भरती झाली असल्याचे कळते. रविवारी सकाळी हे दोघे रस्त्याच्या बाजूला व्यायाम करीत असताना अंबाजोगाई कडून अहमदपूर कडे जाणाऱ्या भरधाव वेगातील कार क्रमांक एम एच 44 एस 7970 या कारने दोघांना धडक दिली. यात मुकुंद मुंढे याचा जागीच मृत्यू झाला तर प्रतिक मुंढे हा गंभीर जखमी झालेल्या अवस्थेत त्याला अंबाजोगाई येथील शासकीय रुग्णालयात उपचारासाठी दाखल करण्यात आले आहे. पोलीस खात्यात भरती होऊन सेवा करण्याची स्वप्न पाहणाऱ्या एका तरूण मुलाचा मृत्यू झाला तर एक गंभीरपणे जखमी झाल्याने दगडवाडी गावावर शोककळा पसरली आहे. कार चालकास किनगाव पोलीसांनी ताब्यात घेतले आहे.