👉🏻अहमदनगर जिल्ह्यात ‘लाडकी बहीण’ योजनेसाठी सात लाख अर्ज..

Aug 2, 2024 सीएम

मुख्यमंत्री माझी लाडकी बहीण योजनेसाठी नगरसह राज्यात युद्धपातळीवर काम सुरू आहे. अंगणवाडी सेविका, सेतू केंद्र, ग्रामसेवक आदी अधिकारी या योजनेत महिलांचे अर्ज दाखल करण्यासाठी राबत आहेत. नगर जिल्ह्यात आतापर्यंत ७ लाख महिलांची नोंदणी झालेली आहे, अशी माहिती महिला व बालकल्याण विभागाचे जिल्हा कार्यक्रम अधिकारी मनाेज ससे यांनी दिली.

स्वतंत्र कक्षाची स्थापना
मुख्यमंत्री-लाडकी बहीण योजनेसाठी प्राप्त झालेल्या महिलांच्या अर्जाची छाननी जलदगतीने व्हावी, यासाठी तालुकास्तरावर स्वतंत्र अशा छाननी कक्षाची स्थापना करण्यात आली आहे. या कक्षातून अर्जांच्या छाननीचे काम युद्धपातळीवर करत आहेत. नगर तालुक्यातील छाननी कक्षास प्रभारी जिल्हाधिकारी आशिष येरेकर यांनी प्रत्यक्ष भेट देत पाहणी केली. या योजनेंतर्गत आजपर्यंत एकूण ४३ हजार ७११ पात्र लाभार्थ्यांना पोर्टलवर मान्यता देण्यात आली आहे. या योजनेचा अधिकाधिक लाभार्थ्यांनी लाभ घेण्याचे आवाहन येरेकर यांनी केले आहे.