- कापूस वेचणी व मका काढणीच्या वेळी मोठा फटका; शेतकऱ्यांकडून पीक विम्याची मागणी.
गंगापूर (प्रतिनिधी – अमोल पारखे): गंगापूर तालुक्यातील वाहेगाव, नेवरगाव, मांजरी, वरखेड, मुद्देश, वाडगाव अशा अनेक ग्रामीण भागांत शुक्रवार ते मंगळवार या पाच दिवसांच्या कालावधीत कमी-अधिक प्रमाणात झालेल्या अवकाळी पावसामुळे शेतीचे मोठे नुकसान झाले आहे. वेचणीस आलेल्या कापसाला आणि काढणी करून ठेवलेल्या मक्याच्या पिकाला याचा सर्वाधिक फटका बसला आहे.
कापूस आणि मक्याचे मोठे नुकसान
सध्या गंगापूर परिसरात सर्वत्र मका पिकाची कापणी आणि कापूस वेचणीची लगबग सुरू आहे. ऐन वेळेवर झालेल्या या पावसामुळे शेतकऱ्यांचे मोठे नुकसान झाले आहे:
- मका पिकाचे नुकसान: शेतात सोंगणी करून टाकलेल्या मक्याच्या कणसांना कोंब (अंकुर) फुटायला सुरुवात झाली आहे.
- कापसाचे नुकसान: रब्बी पिकांच्या लागवडीमुळे आणि मजुरांच्या अभावी कपाशी वेचणीची कामे मागे पडली आहेत. या पावसामुळे उभ्या असलेल्या कपाशीच्या वाती झाल्या असून, कपाशीच्या कैऱ्या सडायला लागल्या आहेत.
वाहेगाव शिवारात वेचणीस आलेल्या कापसाच्या पावसाने अशाच वाती झाल्याचे चित्र आहे. मातीतून सोनं पिकवणाऱ्या शेतकऱ्याला निसर्गाच्या पुढे पुन्हा एकदा हतबल व्हावे लागले आहे.
शेतकऱ्यांची मागणी
यंदा कापसाला आधीच योग्य भाव मिळत नाहीये, त्यातच पुन्हा अवकाळी पावसाने हे मोठे नुकसान केले आहे. यामुळे शासनाने तातडीने नुकसानीचे पंचनामे करावेत आणि शेतकऱ्यांना पीक विम्याचे पैसे देऊन त्वरित आर्थिक मदत करावी, अशी मागणी शेतकरी वर्गातून जोर धरू लागली आहे.
प्रतिनिधी अमोल पारखे,
एनटीव्ही न्यूज मराठी, गंगापूर, छ. संभाजीनगर.