नळदुर्ग नगराध्यक्षपदासाठी शिवसेनेचे विश्वासू जननेते कमलाकर चव्हाण इच्छुक..!

• ‘सर्वांगीण विकास’ हे मुख्य ध्येय, रोजगार निर्मिती व शेतकऱ्यांच्या समस्या सोडवण्यावर भर

नळदुर्ग (प्रतिनिधी – आयुब शेख): नळदुर्ग शहराच्या राजकारणात शिवसेनेचे प्रामाणिक आणि कार्यकर्त्यांच्या भावनांना न्याय देणारे नेते कमलाकर निवृत्ती चव्हाण यांनी आगामी नगराध्यक्षपदासाठी आपली स्पष्ट इच्छा व्यक्त केली आहे. जनतेच्या प्रश्नांसाठी नेहमी अग्रभागी राहणारे चव्हाण यांनी ‘नळदुर्गचा सर्वांगीण विकास’ हाच आपला मुख्य ध्यास असल्याचे स्पष्ट केले आहे.

विकासाचा स्पष्ट दृष्टिकोन

कमलाकर चव्हाण यांचा नगराध्यक्षपदाचा उद्देश केवळ निवडणूक जिंकणे नसून, नळदुर्ग शहर आणि तालुक्याला एक नवा दर्जा मिळवून देणे आहे. त्यांच्या मुख्य धोरणांमध्ये नागरिकांना मूलभूत सुविधा, पर्यटनवाढ आणि स्थानिक रोजगारनिर्मितीचा समावेश आहे.

१. ऐतिहासिक वारसा आणि पर्यटन विकास: नळदुर्गच्या ऐतिहासिक आणि धार्मिक वारशाचे महत्त्व ओळखून, श्री खंडोबा मंदिर, रामतीर्थ मंदिर, सरकार नानिमा दर्गा आणि नळदुर्गचा प्राचीन किल्ला या स्थळांचा विकास करण्याचे त्यांचे उद्दिष्ट आहे. यामुळे शहराला राष्ट्रीय आणि आंतरराष्ट्रीय पर्यटन नकाशावर स्थान मिळवून देण्याचा त्यांचा संकल्प आहे.

२. औद्योगिक प्रगती आणि रोजगारनिर्मिती: स्थानिक युवकांसाठी रोजगारनिर्मिती हे त्यांच्या कार्यक्रमाचे केंद्रबिंदू असेल.

• तालुक्यात औद्योगिक वसाहत स्थापन करणे.
• नगरपरिषदेच्या जागांवर शॉपिंग कॉम्प्लेक्स आणि लघुउद्योग केंद्रे उभारून उद्योजकतेला चालना देणे.

३. शेतकऱ्यांसाठी बांधिलकी: तालुक्यातील शेतकऱ्यांच्या समस्यांवर ठोस भूमिका घेत, “एकही शेतकरी आत्महत्या करणार नाही, हे आमचं ध्येय आहे,” असे त्यांनी ठामपणे सांगितले. सिंचन व्यवस्था सुधारणे, कर्जमाफी आणि शेतमालाला योग्य बाजारभाव मिळवून देण्यासाठी ते लढा देणार आहेत.

४. मूलभूत सुविधा आणि स्वच्छ शहर: नळदुर्ग शहरात स्वच्छता, पाणीपुरवठा, दिवाबत्ती, रस्ते आणि पायाभूत सुविधांमध्ये दर्जेदार सुधारणा करण्यावर त्यांचा भर आहे. शहरातील कोणताही नागरिक मूलभूत सुविधांपासून वंचित राहू नये, हा त्यांचा ठाम निर्धार आहे.

साध्या शिवसैनिकापासून जनतेच्या मनात विश्वास निर्माण करणाऱ्या नेत्यापर्यंतचा कमलाकर चव्हाण यांचा प्रवास आगामी नगरपरिषद निवडणुकीत नळदुर्गच्या नागरिकांसमोर त्यांच्या कामाचा आणि विकासाच्या वचनबद्धतेचा ठसा उमटवणार असल्याचे दिसून येत आहे.

प्रतिनिधी आयुब शेख,

एनटीव्ही न्यूज मराठी, नळदुर्ग, धाराशीव.