मोठा दरोडा टाकण्यापूर्वीच टोळी गजाआड! धाराशिव पोलिसांची धडाकेबाज कारवाई; ७ जणांना बेड्या..!

• तब्बल १० लाख ८९ हजार रूपयांचा मुद्देमाल जप्त..!
• स्थानिक गुन्हे शाखेच्या सतर्कतेमुळे मोठा अनर्थ टळला..!

धाराशिव प्रतिनिधी, (दि. ०४ जानेवारी)

धाराशिव: धाराशिव शहरात दरोडा टाकण्याच्या तयारीत असलेल्या एका सराईत गुन्हेगारांच्या टोळीचा स्थानिक गुन्हे शाखेने (LCB) पर्दाफाश केला आहे. कळंब-धाराशिव रोड परिसरात सापळा रचून पोलिसांनी सात जणांना रंगेहाथ अटक केली असून, त्यांच्याकडून दोन वाहनांसह घातक शस्त्रे जप्त करण्यात आली आहेत.

कशी झाली कारवाई?

कळंब-धाराशिव रोडवर काही इसम दोन पिकअप वाहनांसह संशयास्पद हालचाली करत असल्याची माहिती पोलिसांना पेट्रोलिंगदरम्यान मिळाली होती. माहिती मिळताच स्थानिक गुन्हे शाखेच्या पथकाने तातडीने घटनास्थळी धाव घेऊन घेराबंदी केली. यावेळी ही टोळी दरोड्याच्या तयारीत असल्याचे निष्पन्न झाले.

जप्त केलेला मुद्देमाल

पोलिसांनी आरोपींची झडती घेतली असता त्यांच्याकडे दरोड्यासाठी लागणारे साहित्य आणि घातक शस्त्रे मिळून आली.

आरोपींचा गुन्हेगारी इतिहास

अटक करण्यात आलेले सातही आरोपी कळंब, तुळजापूर आणि शिराढोण परिसरातील रहिवासी असून ते सराईत गुन्हेगार आहेत. त्यांच्यावर यापूर्वी दरोडा, जबरी चोरी आणि वाहन चोरी सारखे अनेक गंभीर गुन्हे दाखल आहेत. या प्रकरणी कळंब पोलीस ठाण्यात गु.र.नं. ०४/२०२६ अन्वये भारतीय न्याय संहिता (BNS) आणि शस्त्र अधिनियमांतर्गत गुन्हा दाखल करण्यात आला आहे.

पोलीस पथकाचे यश

ही कारवाई पोलीस अधीक्षक श्रीमती रितू खोबर व अपर पोलीस अधीक्षक श्रीमती शफकत आमना यांच्या मार्गदर्शनाखाली पार पडली. या पथकात पोलीस निरीक्षक विनोद इजपवार यांच्यासह अर्जुन खटके, नितीन जाधव, अमोल जाधव, दयानंद गाडकर आणि इतर अंमलदारांचा समावेश होता.

प्रतिनिधी आयुब शेख, धाराशिव.