खरीप हंगाम २०२६ च्या पीक विमा योजनेत सहभागी होण्यासाठी शेतकऱ्यांना आता आणखी एक संधी मिळाली आहे. आमदार अमोल जावळे यांच्या पाठपुराव्यानंतर पीक विमा अर्ज भरण्याची मुदत १५ नोव्हेंबरपर्यंत वाढवण्यात आली आहे.
खरीप हंगाम २०२६ मधील पीक विमा योजनेत सहभागी होताना शेतकऱ्यांना अनेक तांत्रिक अडचणींचा सामना करावा लागत होता. डिजिटल क्रॉप सर्व्हे (DCS) प्रणालीतील अडचणी, गावांच्या नकाशांमधील त्रुटी, पीक पाहणीच्या नोंदी उपलब्ध नसणे तसेच सातबारा उताऱ्यावरील माहिती आणि ऑनलाइन प्रणालीतील तफावत यामुळे अनेक पात्र शेतकऱ्यांना अर्ज भरता येत नव्हते.
पीक विमा अर्ज भरण्याची अंतिम मुदत ३१ ऑक्टोबर २०२६ होती. मात्र, या अडचणींमुळे शेतकरी योजनेच्या लाभापासून वंचित राहण्याची शक्यता निर्माण झाली होती.
ही बाब लक्षात घेऊन आमदार अमोल जावळे यांनी २२ ऑक्टोबर रोजी कृषी विभागाच्या प्रधान सचिवांकडे निवेदन सादर केले होते. पीक विमा योजनेसह डिजिटल पीक पाहणी प्रक्रियेलाही मुदतवाढ देण्याची मागणी त्यांनी केली होती.
आमदार अमोल जावळे यांच्या या पाठपुराव्याला यश आले असून, पीक विमा योजनेत सहभागी होण्यासाठी आता १५ नोव्हेंबरपर्यंत मुदतवाढ मिळाली आहे. त्यामुळे रावेर-यावलसह राज्यातील शेतकऱ्यांना मोठा दिलासा मिळणार आहे.
दरम्यान, पात्र शेतकऱ्यांनी वाढीव मुदतीचा लाभ घेत १५ नोव्हेंबरपूर्वी आपले पीक विमा अर्ज भरून घ्यावेत, असे आवाहन करण्यात आले आहे.