पुणे : प्रजासत्ताक दिनाच्या दिवशी राजगडावर फिरायला गेलेल्या पर्यटकाचा मृत्यू झाल्याची दुर्दैवी घटना समोर आली आहे. अनिल विठ्ठल आवटे (वय-१८) असे मृत्यू झालेल्या पर्यटकाचे नाव आहे. गड उतरत असताना बुरूजाचा दगड डोक्यात पडल्यामुळे या तरूणाचा मृत्यू झाला. रविवारी राजगडावर ८ हजारपेक्षा जास्त पर्यटकांनी भेट दिली.
मिळालेल्या माहितीनुसार, प्रजासत्ताक दिनानिमित्त राजगड किल्ल्यावर पर्यटकांची भरपूर गर्दी होती. रविवारी, गडावर ८ हजाराहून अधिक पर्यटक होते. यामध्ये अनिल आवटेही फिरण्यासाठी आला होता. दरम्यान पाली दरवाजाजवळ गड उतरत असताना बुरुजाचा दगड त्याच्या डोक्यावर पडला. त्यामुळे त्याच्या कानातून मोठ्या प्रमाणात रक्तस्राव होऊ लागला. त्याला त्याच्या सहकाऱ्यांनी वेल्हे ग्रामीण रुग्णालय येथे उपचारासाठी आणले होते. मात्र वेल्हे ग्रामीण रुग्णालयात अनिल यास मृत घोषित करण्यात आले.
मयत अनिल आवटे हा खादगाव भाबट ता. सेलू, जि. परभणी येथील आहे. पोलीस भरतीच्या तयारीसाठी धायरी येथे तो चुलत्याकडे राहत होता व धायरी येथेच पोलीस भरतीच्या प्रशिक्षणासाठी खासगी क्लासेसमध्ये तयारी करत होता. प्रजासत्ताक दिन असल्याने याच प्रशिक्षण संस्थेच्या इतर सहकाऱ्यांसमवेत अनिल हा राजगड किल्ला फिरण्यासाठी आला होता. त्यावेळी डोक्यात दगड पडून त्याचा मृत्यू झाला. घटनेचा तपास वेल्हे पोलीस करीत आहेत.