(प्रतिनिधी मंगेश उराडे, NTV न्यूज मराठी, नागपूर)
सावनेर (नागपुर) – भारतीय जनता पार्टी (भाजप) चे ज्येष्ठ कार्यकर्ते आणि ओबीसी आघाडीचे माजी अध्यक्ष अँड. प्रकाश टेकाडे यांनी अधिकृतपणे भाजपमध्ये ‘घर वापसी’ केली आहे. नागपूर जिल्हा ग्रामीणचे अध्यक्ष मनोहर कुंभारे यांनी शाल पांघरून त्यांचे पक्षात स्वागत केले.
यावेळी भाजपचे राज्यस्तरीय सदस्य डॉ. राजीव पोतदार, नागपूर जिल्हा उपाध्यक्ष रामराव मोवाडे, माजी जिल्हा परिषद सदस्य देविदास मदनकर, तालुका अध्यक्ष मंदार मंगळे, शहर अध्यक्ष राजू घुगल आदी मान्यवर प्रामुख्याने उपस्थित होते.
“मी भाजपचा होतो, आहे आणि राहीन”
पक्षात परतल्यानंतर आपले मत व्यक्त करताना अँड. प्रकाश टेकाडे म्हणाले की, “मी भारतीय जनता पार्टीचा होतो, आहे आणि राहीन.” काही अंतर्गत मतभेदांमुळे विधानसभा निवडणुकीदरम्यान त्यांना पक्षातून काढल्याची घोषणा करण्यात आली होती. मात्र, राज्याचे मुख्यमंत्री देवेंद्र फडणवीस, महसूल मंत्री चंद्रशेखर बावनकुळे आणि भारतीय जनता पार्टीच्या प्रदेशाध्यक्षांनी आज त्यांची पक्षात ‘घर वापसी’ घडवून आणली आहे. “गेले वर्षभर मी पक्षाच्या हितासाठीच काम करत होतो आणि आता इतक्या प्रदीर्घ विश्रांतीनंतर पूर्णपणे तरोताजा होऊन परतलो आहे, ज्याचा फायदा भारतीय जनता पार्टीला आगामी नगरपालिका, पंचायत समिती आणि जिल्हा परिषद निवडणुकीत नक्कीच होईल.” असा विश्वास अँड. प्रकाश टेकाडे यांनी माध्यमांशी बोलताना व्यक्त केला.
‘अनुशासन’ हा भाजपचा आधार
राज्यस्तरीय सदस्य डॉ. राजीव पोतदार यांनी यावेळी टेकाडे यांचे पक्षात स्वागत केले. पत्रकारांच्या प्रश्नांना उत्तरे देताना ते म्हणाले की, “भारतीय जनता पार्टी शिस्तीने (अनुशासन) काम करते. शिस्तभंग केल्यास कारवाई करणे ही पक्षांतर्गत बाब असते, याच कारणामुळे भारतीय जनता पार्टी आज देशातील सर्वात मोठा पक्ष आहे.” त्याचप्रमाणे, “देशाचा संपूर्ण विश्वास पंतप्रधान नरेंद्र मोदी आणि राज्याचे लोकप्रिय मुख्यमंत्री देवेंद्र फडणवीस यांच्यावर आहे”, असे विचार त्यांनी यावेळी व्यक्त केले.
प्रतिनिधी मंगेश उराडे, नागपूर