नागपूर जिल्ह्यातील सावनेर येथे विजयादशमीच्या निमित्ताने आयोजित दसरा मेळाव्यात आमदार डॉ. आशिषराव देशमुख यांनी विकास, औद्योगिकीकरण, रोजगारनिर्मिती आणि कायदा-सुव्यवस्थेवर भर दिला. विकासाला विरोध करणाऱ्या विषारी आणि अविचारी प्रवृत्ती इतिहासजमा होतील, असे विधान करत त्यांनी सावनेर-कळमेश्वर विधानसभा क्षेत्राच्या सर्वांगीण विकासाचा निर्धार व्यक्त केला.
मंगळवार, २० ऑक्टोबर २०२६ रोजी सावनेर नगरपरिषद मैदानावर हा दसरा मेळावा पार पडला. नगरसेवक मंदार मंगळे यांनी आमदारांच्या गेल्या दोन वर्षांतील १०० कोटींची पाणीपुरवठा योजना, आठ कोटींचे अत्याधुनिक वाचनालय आणि नमो उद्यान यांसह विकासकामांचा उल्लेख केला.
सावनेर-कळमेश्वर परिसरात कायदा-सुव्यवस्था मजबूत करण्यासाठी मोहपा येथे नवीन पोलीस ठाणे सुरू करण्यात आले असून, खापरखेडा पोलीस ठाणे नागपूर ग्रामीण पोलिसांच्या अखत्यारीत वर्ग करण्यात आल्याचे आमदारांनी सांगितले.
सावनेर तालुक्यातील सुमारे ६,४०० एकर क्षेत्रावरील प्रस्तावित औद्योगिक विकासातून युवकांना रोजगाराच्या संधी उपलब्ध होतील, अशी अपेक्षा त्यांनी व्यक्त केली. औद्योगिक प्रकल्पासाठी कोरडवाहू जमिनीला प्रति एकर ३२ लाख, बागायती जमिनीला ४६ ते ४८ लाख आणि फळबागांसाठी ६४ ते ६५ लाख रुपयांपर्यंत मोबदल्याची तरतूद अपेक्षित असल्याचे त्यांनी सांगितले. शेतकऱ्यांवर अन्याय होऊ नये, यासाठी गरज पडल्यास आंदोलन करण्याची तयारीही त्यांनी दर्शवली.
मोहपा परिसरात गौतम बुद्धांची भव्य मूर्ती आणि बुद्धवन उभारणे, सावनेर येथे ४४ कोटी रुपयांचे न्यायमंदिर, गावोगावी वाचनालये, व्यायामशाळा, आरओ पिण्याच्या पाण्याची सुविधा, पाणीटंचाई निवारण, महिलांसाठी मोफत सॅनिटरी नॅपकिन आणि रुग्णवाहिका सुविधा यांसारख्या उपक्रमांचा त्यांनी उल्लेख केला. कळमेश्वर येथे विदर्भातील भव्य भारतीय राष्ट्रध्वज उभारण्याचाही मानस त्यांनी व्यक्त केला.
सावनेर-कळमेश्वरचा सर्वांगीण विकास, रोजगारनिर्मिती, शांतता, सुरक्षितता आणि मूलभूत सुविधांसाठी सातत्याने काम करण्याचा निर्धार आमदार डॉ. आशिषराव देशमुख यांनी व्यक्त केला.
यावेळी आमदार डॉ. राजीव पोतदार, मनोहर कुंभारे, रामराव मोवाडे, नगराध्यक्ष संजना मंगळे, राजू घुगल, योगिता घोरमारे, बंडू दिवटे आदी नगरसेवक आणि इतर मान्यवर उपस्थित होते.
मंगेश उराडे | एनटीव्ही न्यूज मराठी | नागपूर