- शिवसेनेच्या (शिंदे गट) उमेदवाराला शहरातून उत्तम प्रतिसाद; नऊ उमेदवारांमुळे निवडणूक चुरशीची..!
जामखेड प्रतिनिधी (दि. २७ नोव्हेंबर)
अहिल्यानगर: जामखेड नगरपरिषद निवडणुकीच्या रणधुमाळीमुळे थंडीच्या दिवसांतही शहरातील राजकीय वातावरण चांगलेच तापले आहे. नगराध्यक्षपदासाठी शिवसेनेच्या (शिंदे गट) उमेदवार सौ. पायल आकाश बाफना यांना अनुक्रमांक ५ मिळाला असून, त्यांची उमेदवारी सध्या शहरात जोरदार चर्चेत आहे.
पायल बाफना यांच्या उमेदवारीकडे लक्ष
नगराध्यक्षपदाच्या निवडणुकीत यंदा तब्बल नऊ उमेदवार रिंगणात उतरले आहेत. यामुळे ही निवडणूक अत्यंत चुरशीची होणार असल्याचे स्पष्ट झाले आहे. शिवसेना पक्षाच्या वतीने अधिकृत उमेदवारी मिळालेल्या सौ. पायल ताई आकाश बाफना यांच्याकडे सर्वांचे लक्ष वेधले गेले आहे. सामाजिक कामाचा ठसा उमटविल्यामुळे त्यांची महिलांमध्ये चांगली लोकप्रियता आहे. त्यांच्या नावाच्या घोषणेनंतर शिवसेना कार्यकर्त्यांमध्ये उत्साहाचे वातावरण पाहायला मिळाले.
रणनीती आणि उत्सुकता
वाढत्या राजकीय तापमानामुळे शहरातील राजकारणाला वेग आला असून, नागरिकांमध्ये उत्सुकता निर्माण झाली आहे. सर्वच पक्षांच्या गोटात जोरदार रणनीती आखली जात असून प्रत्येक उमेदवार निवडणुकीसाठी समर्थपणे प्रयत्न करत आहे.
प्रभागनिहाय विविध राजकीय समीकरणे, स्थानिक प्रश्न, विकासाच्या अपेक्षा आणि नागरिकांचे मतप्रवाह या सर्वांवर येणारा निकाल अवलंबून राहणार आहे. जामखेड शहराच्या विकासासाठी योग्य नेतृत्व निवडण्याची जबाबदारी मतदारांवर असून, सर्वच उमेदवारांनी मतदारांचा विश्वास जिंकण्यासाठी आपली प्रचार मोहीम आता अधिक आक्रमक करण्यास सुरुवात केली आहे.
प्रतिनिधी नंदु परदेशी,
एनटीव्ही न्यूज मराठी, जामखेड, अहिल्यानगर.