👉🏻रडायचे नाही लढायचे..देवेंद्र फडणवीस

आम्हाला छत्रपती शिवाजी महाराजांनी सांगितलं आहे, रडायचे नाही लढायचे. आम्ही पळून जाणारे नाही. आम्ही लढणारे आहोत, अशा प्रकरणांमधील नराधमांना शिक्षा झाल्याशिवाय आम्ही मागे हटणार नाही. काहीही झाले तरी चालेल या नराधमांना समाप्त केल्याशिवाय आम्ही मागे हटणार नाही. ही गोष्ट विरोधकांना ठणकावून सांगतो. त्यांना राजकारण करू द्या. कारण ते संवेदनाहीन आहेत, असे प्रतिपादन राज्याचे उपमुख्यमंत्री देवेंद्र फडणवीस यांनी केले.

कोल्हापूरच्या तपोवन मैदानात आज (गुरुवारी) महिला सशक्तीकरण अभियानांतर्गत ‘मुख्यमंत्री माझी लाडकी बहीण योजना’ लाभार्थी सन्मान सोहळा आयोजित करण्यात आला होता. या कार्यक्रमाला ते बोलत होते. यावेळी फडणवीस म्हणाले, महायुतीचे ठरवले आहे की अशा प्रकारच्या घटनांमधील आरोपींना सोडणार नाही. त्यांना कठोरात कठोर शिक्षा केली जाईल. कोलकात्यामध्ये एका डॉक्टर तरुणीवर भयानक अत्याचार झाले. मात्र, महाविकास आघाडीतील लोकांनी त्या प्रकरणावर बोलण्यासाठी तोंडे उघडली नाहीत. कोलकत्यातील डॉक्टर तरुणीवर झालेल्या अत्याचारानंतरही हे लोक ममता बॅनर्जी यांचं कौतुक करत राहिले.महाराष्ट्रात अशीच घटना घडल्यावर मात्र, हेच लोक गृहमंत्र्यांनी राजीनामा द्यावा, अशा प्रकारच्या मागण्या करू लागले आहेत, असे त्यांनी सांगितले.