एमपीएससीची राज्य सेवा संयुक्त पूर्व परीक्षा व आयबीपीएस परीक्षा या दोन्ही परीक्षा एकाच दिवशी ठेवण्यात आल्या होत्या. या निर्णयाविरोधात पुण्यात एमपीएससीच्या विद्यार्थ्यांकडून आंदोलन करण्यात येत आहे. या आंदोलनाला मोठे यश आले आहे. एमपीएससीच्या आज झालेल्या बैठकीत 25 ऑगस्टची परीक्षा पुढे ढकलण्याचा निर्णय घेण्यात आला. या बैठकीमध्ये 25 ऑगस्ट 2024 रोजी नियोजित महाराष्ट्र राजपत्रित नागरी सेवा संयुक्त पूर्व परीक्षा पुढे ढकलण्याचा निर्णय घेण्यात आला.
परीक्षेची तारीख लवकरात लवकर जाहीर करण्यात येईल, असे ट्विट करत महाराष्ट्र लोकसेवा आयोगाकडून ही घोषणा करण्यात आली. ही परीक्षा पुढे ढकलण्यात आली आहे. मात्र, लोकसेवा आयोगाने पुढे ढकलण्यात आलेल्या परिक्षेत कृषी विभागाच्या २५८ जागांचा देखील समावेश करावा, या २५८ जागांसाठी परिक्षा घेण्याचे नोटीफिकेशन काढावे, अशी विद्यार्थ्यांची मागणी आहे. तोपर्यंत आंदोलन मागे न घेण्याचा विद्यार्थ्यांचा निर्णय आहे. त्यामुळे कृषी विभागाच्या जागांबाबत जोपर्यंत निर्णय होत नाही तोपर्यंत विद्यार्थ्यांचे आंदोलन सुरुच राहणार आहे.
