मस्साजोगचे सरपंच संतोष देशमुख कुटुंबीयांच्या भेटीला त्यांच्या परवानगीनंतरच जाणार असल्याचं राज्याच्या मंत्री पंकजा मुंडे यांनी म्हटलं. ज्यावेळी हे प्रकरण घडलं त्यावेळी परिस्थिती चिघळल्याने देशमुख कुटुंबीयांनी आपल्याला भेटायाला येऊ नका अशी विनंती केली होती. त्यामुळेच आपण त्यांना भेटायला गेले नसल्याचं पंकजा मुंडे यांनी स्पष्ट केलं. राज्याच्या पर्यावरण मंत्री पंकजा मुंडे यांनी नांदेड जिल्ह्यातील माहूर येथे जाऊन श्री रेणुका मातेचे दर्शन घेतले.त्यानंतर त्यांनी माध्यमांशी विविध विषयांवर संवाद साधला.
पंकजा मुंडे म्हणाल्या की, “सरपंच संतोष देशमुख हत्या प्रकरण घडल्यानंतर मी देशमुख कुटुंबीयांची भेट घेण्याचा प्रयत्न केला. त्यावेळी त्यांनीच मला विनंती केली की परिस्थिती चांगली नाही, तुम्ही येऊ नका. आता त्यांची परवानगी घेऊन जाईन असं मी आधीच जाहीर केल आहे. माझ्या जाण्यापेक्षा न्याय मिळणं महत्त्वाचं आहे. मी तिथे जाणे, संवेदना व्यक्त करणे हा माझा वैयक्तिक विषय आहे. त्याचं जगासमोर प्रगटीकरण करण्याची आवश्यकता नाही.”