पुणे-नगर हायवेजवळ आढळला अंदाजे २५ ते ३० वयाच्या अज्ञात तरुणाचा मृतदेह.
मृतदेहाच्या डाव्या कानाखाली ‘आई’ आणि उजव्या हातावर ‘क्षत्रिय कुलवंतस’ असे टॅटू.
गुलाबी प्रिंटेड शर्ट, काळी पॅन्ट… तरुणाच्या ओळखीसाठी सुपा पोलिसांचे आवाहन.
अपघातामुळे की घातपात? मृतदेहामुळे नारायणगव्हान परिसरात खळबळ.
अहमदनगर जिल्ह्यातील पारनेर तालुक्यात, पुणे-नगर हायवेपासून अवघ्या १०० मीटर अंतरावर एका अज्ञात तरुणाचा मृतदेह आढळून आल्याने खळबळ उडाली आहे. दि. १३ नोव्हेंबर २०२५ रोजी सकाळी ६.३० वाजता सुपा पोलीस ठाण्याच्या हद्दीतील नारायणगव्हान शिवारात हा मृतदेह पोलिसांना मिळाला. मृत व्यक्तीचे वय अंदाजे २५ ते ३० वर्षे असून, त्याच्या ओळखीसाठी सुपा पोलिसांनी आवाहन केले आहे. मयताची ओळख पटवण्यासाठी पोलिसांनी त्याच्या शरीरावरील विशेष खुणा आणि कपड्यांचे वर्णन प्रसिद्ध केले आहे.
मृत तरुणाचे शारीरिक वर्णन पुढीलप्रमाणे आहे: त्याची उंची अंदाजे ५ फूट ५ इंच, रंग गोरा आणि केस कुरळे आहेत. मृतदेहावर गुलाबी रंगाचा प्रिंटेड फुल बाहीचा शर्ट आणि काळ्या रंगाची ARMANI पॅन्ट आहे. विशेष खुणांमध्ये, मृत तरुणाच्या डाव्या कानाखाली ‘आई’ असे गोंदलेले (टॅटू) आहे. तसेच, त्याच्या उजव्या हातावर ‘क्षत्रिय कुलवंतस’ आणि गणपतीचे टॅटू आहेत. उजव्या हातावर लाल आणि भगव्या रंगाचे दोरे बांधलेले असून, उजव्या व डाव्या पायाच्या अंगठ्या आहेत. डाव्या पंज्याजवळ त्याला जुन्या जखमेची खूण देखील आहे. ही व्यक्ती मिसिंग असल्यास किंवा कोणाकडे याबाबत काही माहिती असल्यास, तात्काळ सुपा पोलीस स्टेशनशी संपर्क साधावा, असे आवाहन पोलीस निरीक्षक ज्योती गडकरी यांनी केले आहे. या घटनेमुळे परिसरात एक गूढ निर्माण झाले असून, पोलीस या मृतदेहाच्या मृत्यूचे कारण शोधत आहेत.
एनटीव्ही न्यूज मराठी, AHILYANAGAR