जामखेड (अहिल्यानगर): जामखेड ते सौताडा या राष्ट्रीय महामार्ग क्र. ५४८ डी वरील अतिक्रमणे आणि रस्त्याच्या कामातील अनियमिततेविरोधात अखेर जनआंदोलनाचे हत्यार उपसण्यात आले आहे. वारंवार तक्रारी करूनही प्रशासनाकडून दाद मिळत नसल्याने, सामाजिक कार्यकर्ते अवधूत पवार यांनी मंगळवारपासून (२४ फेब्रुवारी) तहसील कार्यालयासमोर बेमुदत उपोषण सुरू केले आहे.
काय आहे मुख्य प्रकरण?
राष्ट्रीय महामार्गाच्या हद्दीत असलेली पक्की अतिक्रमणे आणि रस्त्याच्या कामात होत असलेला निकृष्ट दर्जा, यांबाबत स्थानिक ग्रामस्थांमध्ये मोठा असंतोष आहे. यासंदर्भात ९ फेब्रुवारी रोजी जिल्हाधिकाऱ्यांना निवेदन देऊन १५ दिवसांची मुदत देण्यात आली होती. मात्र, प्रशासनाने कोणतीही ठोस कारवाई न केल्याने पवारांनी उपोषणाचा मार्ग स्वीकारला आहे.
उपोषणातील प्रमुख मागण्या आणि मुद्दे:
निवेदनाद्वारे निवासी जिल्हाधिकारी दादासाहेब गिते यांचे लक्ष खालील गंभीर बाबींकडे वेधण्यात आले आहे:
- पक्की अतिक्रमणे: महामार्गाच्या हद्दीतील अनधिकृत पक्की बांधकामे त्वरित हटवावीत.
- कामाचा दर्जा: रस्त्याच्या कामात होत असलेली अनियमितता आणि निकृष्ट दर्जाची चौकशी व्हावी.
- तांत्रिक फेरफार: ‘जियो-टॅगिंग’मध्ये संभाव्य फेरफार झाल्याचा संशय व्यक्त करण्यात आला असून त्याची तपासणी व्हावी.
- विद्युत खांबांचा धोका: महावितरणचे विद्युत खांब रस्त्यात अडथळा ठरत असून, त्यामुळे अपघाताची शक्यता निर्माण झाली आहे.
प्रशासनाला इशारा
अवधूत पवार यांनी स्पष्ट केले आहे की, १५ दिवसांच्या मुदतीत केवळ कागदी घोडे नाचवले गेले, मात्र प्रत्यक्ष जमिनीवर कोणतीही परिणामकारक कारवाई झाली नाही. “प्रशासनाने जर तातडीने सकारात्मक निर्णय घेतला नाही, तर हे उपोषण अधिक तीव्र करण्यात येईल,” असा इशाराही त्यांनी दिला आहे.
सध्या तहसील कार्यालयासमोर सुरू असलेल्या या उपोषणाला स्थानिक नागरिकांचा पाठिंबा मिळत असून, प्रशासकीय वर्तुळात आता काय हालचाली होतात, याकडे सर्वांचे लक्ष लागले आहे.
वृत्त संकलन: नंदु परदेशी (जिल्हा प्रतिनिधी, अहिल्यानगर)