जामखेडमध्ये भेसळयुक्त दुधाचा ‘काळा बाजार’ उघड; पोलिसांचा छापा, १७ लाखांचा मुद्देमाल जप्त..!

• केमिकलपासून बनवले जात होते हजारो लिटर दूध; फक्राबादमधील दूध संकलन केंद्रावर कारवाई..!

जामखेड प्रतिनिधी | दि. १६ फेब्रुवारी २०२६

अहिल्यानगर: जामखेड तालुक्यातील फक्राबाद येथे रासायनिक पदार्थांचा वापर करून मानवी आरोग्यास घातक ठरणारे कृत्रिम दूध तयार करणाऱ्या एका मोठ्या रॅकेटचा पर्दाफाश स्थानिक गुन्हे शाखेने (LCB) केला आहे. या कारवाईत पोलिसांनी ३२० लिटर तयार दूध आणि मोठ्या प्रमाणात घातक केमिकलसह एकूण १७ लाख ३२ हजार रुपयांचा मुद्देमाल जप्त केला असून तीन आरोपींना ताब्यात घेतले आहे.

रासायनिक दुधाचा भयानक खेळ

स्थानिक गुन्हे शाखेचे पोलीस निरीक्षक किरणकुमार कबाडी यांना फक्राबाद येथील रामदास नवनाथ उबाळे याच्या दूध संकलन केंद्रात भेसळ होत असल्याची खात्रीलायक माहिती मिळाली होती. त्यानुसार अन्न सुरक्षा अधिकाऱ्यांच्या उपस्थितीत या केंद्रावर छापा टाकण्यात आला.

तपासात धक्कादायक बाबी समोर आल्या:

• पॅराफीनचा वापर: केंद्रावर ११९८ लिटर ‘पॅराफीन’ नावाचे घातक केमिकल सापडले. हे केमिकल दुधात मिसळून त्यापासून कृत्रिम दूध तयार केले जात होते.
• मोठे प्रमाण: जप्त केलेल्या सहा ड्रममधील केमिकलपासून तब्बल २४ हजार लिटर दूध तयार केले जाणार होते, अशी कबुली आरोपींनी दिली.
• आरोग्याला धोका: हे दूध मानवी शरीरासाठी अत्यंत घातक असल्याचे अन्न व औषध प्रशासन विभागाने स्पष्ट केले आहे.

जप्त केलेला मुद्देमाल आणि आरोपी

अटक केलेले आरोपी:

• १. रामदास नवनाथ उबाळे (वय ४६, रा. फक्राबाद, ता. जामखेड) – केंद्राचा चालक.
• २. समीर कमरुद्दीन शेख (वय ३०, रा. उंबरे, ता. राहुरी).
• ३. आफताब कलीम शेख (वय २८, रा. राहुरी).

पोलीस प्रशासनाची सतर्कता

ही धडाकेबाज कारवाई पोलीस अधीक्षक आणि अपर पोलीस अधीक्षकांच्या मार्गदर्शनाखाली पोनि किरणकुमार कबाडी व त्यांच्या पथकाने केली आहे. जामखेड परिसरात अशा प्रकारे आणखी कुठे भेसळ होत आहे का, याचा शोध आता पोलीस घेत आहेत.

भेसळयुक्त दुधामुळे लहान मुले आणि नागरिकांच्या आरोग्याशी खेळणाऱ्या या टोळीवर कठोर कारवाई करण्याची मागणी जामखेड तालुक्यातून होत आहे.

प्रतिनिधी नंदू परदेशी, जामखेड, अहिल्यानगर.