मढी यात्रेत पोलिसांचा ‘खाक्या’ की अरेरावी? पोलीस निरीक्षकांवर भाविकांना मारहाण अन् गाड्यांच्या तोडफोडीचा आरोप..!

• माजी महिला नगरसेविकेला मारहाण केल्याची वरिष्ठ पोलिसांकडे तक्रार..!
• नगर-पाथर्डी रस्त्यावरील वाहतूक कोंडीत घडला प्रकार..!

पाथर्डी प्रतिनिधी | दि. १० मार्च २०२६

अहिल्यानगर: अहिल्यानगर जिल्ह्यातील पाथर्डी तालुक्यात श्री क्षेत्र मढी येथील कानिफनाथ महाराजांच्या यात्रेसाठी आलेल्या भाविकांना पाथर्डी पोलिसांच्या कथित अरेरावीचा सामना करावा लागल्याचा धक्कादायक प्रकार समोर आला आहे. वाहतूक कोंडी सोडवताना पाथर्डी पोलीस ठाण्याचे पोलीस निरीक्षक विलास पुजारी यांनी भाविकांना दमदाटी करून वाहनांच्या काचा फोडल्याचा आणि एका माजी महिला नगरसेविकेला मारहाण केल्याचा गंभीर आरोप करण्यात आला आहे.

५ किलोमीटरच्या रांगा आणि प्रवाशांचे हाल

मढी येथील कानिफनाथांच्या यात्रेनिमित्त राज्यभरातून मोठ्या संख्येने भाविक दाखल झाले होते. यामुळे नगर-पाथर्डी रस्त्यावर तिसगावाजवळ वाहनांच्या ४ ते ५ किलोमीटरपर्यंत लांबच लांब रांगा लागल्या होत्या. तासनतास सुरू असलेल्या या वाहतूक कोंडीमुळे प्रवाशांचे प्रचंड हाल होत होते. ही कोंडी फोडण्यासाठी पोलीस निरीक्षक विलास पुजारी स्वतः पथकासह रस्त्यावर उतरले होते.

फॉर्च्युनर गाडीवर प्रहार आणि महिला लोकप्रतिनिधीला मारहाण

छत्रपती संभाजीनगर येथील शिवसेना नेते निलेश बाबुराव शिंदे आणि त्यांच्या मातोश्री, माजी नगरसेविका पदमाताई शिंदे हे आपल्या फॉर्च्युनर गाडीने (क्र. MH 20 HN 0008) एका विवाह सोहळ्यासाठी जात असताना या कोंडीत अडकले होते. निलेश शिंदे यांनी दिलेल्या निवेदनानुसार:

• तोडफोडीचा प्रयत्न: पोलीस निरीक्षक पुजारी यांनी हातात लाकडी दांडा घेऊन अडकलेल्या वाहनांवर प्रहार करण्यास सुरुवात केली. शिंदे यांच्या गाडीच्या काचेवरही त्यांनी दांडा मारून नुकसान करण्याचा प्रयत्न केला.
• मारहाण व शिवीगाळ: “आम्ही त्यांना ‘काचेवर का मारता?’ असे विचारले असता, त्यांनी माझ्या आईला व मला अर्वाच्य भाषेत शिवीगाळ केली आणि माझ्या आईच्या (पदमाताई शिंदे) पायावर जोरात काठी मारली,” असा खळबळजनक आरोप निलेश शिंदे यांनी केला आहे.

पोलीस निरीक्षकांचा खुलासा

या सर्व आरोपांवर पोलीस निरीक्षक विलास पुजारी यांनी आपली बाजू मांडताना म्हटले आहे की, “मढी यात्रेमुळे नगर-पाथर्डी रस्त्यावर प्रचंड वाहतूक कोंडी झाली होती. ही कोंडी सोडवताना प्रवाशांमध्ये किरकोळ बाचाबाचीचे प्रकार घडले आहेत, मात्र गाडीची काच फोडणे किंवा मारहाण करणे अशी कोणतीही घटना घडलेली नाही.”

सखोल चौकशी आणि कारवाईची मागणी

एका वरिष्ठ पोलीस अधिकाऱ्याने महिला लोकप्रतिनिधीवर हात उचलणे आणि वाहनांचे नुकसान करणे हे बेकायदेशीर असल्याचे निलेश शिंदे यांनी म्हटले आहे. या घटनेमुळे भाविकांमध्ये संतापाचे वातावरण असून, या प्रकरणाची सखोल चौकशी करून दोषी अधिकाऱ्यावर कडक कारवाई करावी, अशी मागणी त्यांनी वरिष्ठ पोलीस प्रशासनाकडे केली आहे.

वृत्त संकलन: भिवसेन टेमकर, एनटीव्ही न्यूज मराठी, अहिल्यानगर.