- जप्त केलेली रेती लंपास झाल्याचा प्रकार उघड
- रेती तस्कर आणि दारू व्यावसायिक निवडणुकीवर प्रभाव पाडण्याची शक्यता;
(प्रतिनिधी, वणी-यवतमाळ) दि. २७ नोव्हेंबर
यवतमाळ: ‘वणी’ तालुक्यात होऊ घातलेल्या जिल्हा परिषद व पंचायत समितीच्या निवडणुकीच्या पार्श्वभूमीवर आंबेडकरी जन आंदोलनाच्या वतीने दिनांक २५/११/२०२५ रोजी, उपविभागीय अधिकारी (एसडीओ), वणी यांना निवेदन सादर करण्यात आले आहे. अवैध धंदे करणारे व्यावसायिक निवडणुकीत कायदा व सुव्यवस्थेचा प्रश्न निर्माण करून स्थानिक स्वराज्य संस्थांच्या निवडणुकीवर प्रभाव पाडू शकतात, अशी भूमिका आंदोलकांनी मांडली आहे.
निवडणुका प्रभावित होण्याची भीती
आंबेडकरी जन आंदोलनाचे मुख्य संयोजक अनिल तेलंग आणि प्रहार पक्षाचे उपजिल्हा प्रमुख मोबीन पिरसाहेब शेख यांनी उपविभागीय अधिकारी यांना निवेदन सादर करताना सांगितले की:
- दहशत आणि आमिष: अवैध रेती तस्कर आणि अवैध दारू व्यावसायिक सामान्य जनतेवर दहशत निर्माण करून, आमिषे देऊन किंवा अन्य मार्गाने आपल्या आवडीचा उमेदवार निवडून आणण्यासाठी प्रयत्न करू शकतात.
- मागणी: जिल्हा परिषदेच्या व पंचायत समितीच्या निवडणुकीत या अवैध व्यावसायिकांचा प्रभाव निष्प्रभ करण्यासाठी अवैध रेती तस्कर, दारू व्यावसायिक व अन्य अवैध धंद्यांवर सक्त कारवाई करण्यात यावी.
जप्त रेती लंपास, अधिकाऱ्यांवर दिरंगाईचा आरोप
आंदोलकांनी यावेळी गंभीर विषयाकडे उपविभागीय अधिकाऱ्यांचे लक्ष वेधले. दिनांक १८/११/२०२५ आणि २०/११/२०२५ रोजी वेकोलीच्या मुंगोली खाण परिसरात (महालक्ष्मी कॅम्प व सायलो परिसर) साठवणूक केलेल्या रेती साठ्यावर कार्यवाही झाली होती. मात्र, महसूल निरीक्षक श्री. राठोड आणि पटवारी श्री. गजभिये यांनी केलेल्या दफ्तर दिरंगाईमुळे रेती तस्करांनी रातोरात जप्त केलेली रेती लंपास केली, याची जाणीव निवेदनाद्वारे करून देण्यात आली.
आंबेडकरी जन आंदोलनाच्या प्रमुख मागण्या
या सर्व पार्श्वभूमीवर आंदोलनाने खालील प्रमुख मागण्या केल्या आहेत:
- अवैध रेती तस्करी बंद करा: शिंदोला-तरोडा सर्कल व कायर-शिरपूर सर्कलमध्ये अवैध रेती तस्करी तत्काळ बंद करण्यात यावी.
- गुन्हा दाखल करा: दिनांक १८/११/२०२५ व २०/११/२०२५ रोजी जप्त करण्यात आलेला रेती साठा लंपास करणाऱ्या अज्ञात रेती तस्करांवर गुन्हा दाखल करण्यात यावा.
- सहकार्य करणाऱ्यांवर कारवाई: मुंगोली खाण परिसरातील सायलो जवळ व महालक्ष्मी कॅम्प मागे रेती साठा असणे म्हणजे मुंगोली उपक्षेत्रीय प्रबंधक आणि एमटेक कंपनी, महालक्ष्मी प्रा. लि. या अंतर्गत कंपन्यांनी रेती तस्करांना सहकार्य केले. त्यामुळे त्यांना सह-आरोपी करण्यात यावे.
निवेदन सादर करताना आंबेडकरी जन आंदोलनचे मुख्य संयोजक अनिल तेलंग, प्रहार पक्षाचे उपजिल्हा प्रमुख मोबीन पिरसाहेब शेख, रितेश भगत, जावेदभाई, प्रदीप मून, रफीक शेख व अन्य सहकारी उपस्थित होते.
प्रतिनिधी, एनटीव्ही न्यूज मराठी (वणी, यवतमाळ).