- वणी तालुक्यात अनधिकृत रेती तस्करीमुळे गंभीर पर्यावरणीय नुकसान.
- पावसाळ्यात पूर येऊन जीवित व वित्तहानीची दरवर्षीची समस्या.
- महसूल अधिकाऱ्यांचे दुर्लक्ष किंवा संगनमत असल्याचा थेट आरोप.
- रॉयल्टीपेक्षा जास्त रेती भरलेल्या वाहनांचे बेकायदेशीर पार्किंग.
गरीबांच्या ‘घरकुला’चे स्वप्न भंगले! वणीमध्ये रेती तस्करांकडून शासनाच्या नियमांची पायमल्ली!
रेती तस्कर आणि महसूल प्रशासनाच्या बेकायदेशीर कृत्यांवर नियंत्रण मिळवण्यासाठी या निवेदनाद्वारे अधिक प्रभावी अंमलबजावणी करण्याची मागणी करण्यात येत आहे. आमच्या वणी उपविभागात सर्वात जास्त वणी तालुक्यात होणारी अनधिकृत रेती तस्करी आणि त्यामुळे होणारे पर्यावरणीय नुकसान गंभीर स्वरूपाचे आहे.
या अनधिकृत तस्करीमुळे पावसाळ्यात गाव आणि शेती दरवर्षीच पुरांनी प्रभावित होऊन जीवितहानी व वित्तहानी झाल्याचे वृत्त दरवर्षीच न्यूज मीडिया आणि वृत्तपत्रात प्रसिद्ध झाले आहे. या वारंवार घडलेल्या घटनांशी आपणही परिचित आहात. आमच्या भागातून युवा सेनेचे अजिंक्य शेंडे यांनीही गेल्या वर्षी या घटनेवर प्रतिबंध घालण्यासाठी आपणाकडे निवेदन सादर केले होते, परंतु परिणामी कोणतीही कारवाई झालेली नाही. आपल्या नेतृत्वात भंडारा आणि वर्धा येथील महसूल अधिकाऱ्यांवर आपण कर्तव्यात अनियमितता प्रकरणी कारवाई करून पारदर्शकता आणली ही बाब प्रशंसनीय आहे, त्याबद्दल आपले हार्दिक अभिनंदन.
आमच्या भागात महसूल विभागातील संबंधित अधिकाऱ्यांचे दुर्लक्ष किंवा संगनमत असल्याशिवाय लेआउट व इतर ठिकाणी खुलेआम रेतीचा साठा उघड्या डोळ्यांनी दिसतो आहे. मौजा वणी तालुका वणी येथील दिनांक १८ नोव्हेंबर २०२५ रोजी मौजा साखरा को. येथील कंपनीच्या जागेवर आढळलेल्या अवैध वाळू साठवणुकीवर स्थानिक तलाठी यांनी कारवाई करून त्याच दिवशी वाळूची विल्हेवाट लावली. सदर कारवाईमध्ये गंभीर शंका निर्माण होत असून संबंधित सर्व नोंदी व दस्त या विभागात उपलब्ध नाहीत. सदर ही रेती तहसीलदाराच्या तोंडी आदेशावर घरकुल लाभार्थ्याला वाटप करण्यात आली, जो बेकायदेशीर आदेश आहे.
रॉयल्टीवर नमूद असलेल्या रेतीपेक्षा जास्त रेती भरलेल्या वाहनांवर महसूल प्रशासन कारवाई करून महसूल प्रशासनाकडे वाहन उभे करण्यासाठी जागा नसल्याने परिवहन विभागाची परवानगी न घेता किंवा तिथल्या रजिस्टरवर त्या रेती भरलेल्या वाहनाची नोंद न करता बस स्टँडमध्ये वाहने उभी करतात. या बेकायदेशीर पार्किंग केल्याप्रकरणी संबंधितांवर कारवाई करण्यात यावी, याबाबतचे पुरावे अर्जदाराकडे उपलब्ध आहेत.
वर्धा नदी पात्रात ७ एप्रिलच्या रात्री दोन वाजता केलेल्या कारवाईत रेती तस्करांवर पोलीस कारवाई न करता त्यांच्यावर महसूल विभागाने दंड ठोठावला. रेती तस्करावर पोलीस कारवाई करणे अनिवार्य असल्याचा जीआर निघाला असूनही महसूल प्रशासनाने पोलीस कारवाई केली नाही. शासनाच्या आदेशाला केराची टोपली दाखवल्याप्रकरणी महसूल अधिकाऱ्यावर कारवाई अपेक्षित आहे.
विविध गैरप्रकारांची चौकशी करून दोषींवर कठोर कारवाई करण्याची आणि ही तस्करी थांबवण्यासाठी कायमस्वरूपी उपाययोजना आपण करून घरकुल लाभार्थ्यांना मुबलक रेती उपलब्ध करून द्यावी, रेती तस्करीतून ‘धन लांडग्यांच्या’ घराचे स्वप्न पूर्ण होत असून, यामुळे रेतीचा तुटवडा पडल्याने गरिबाच्या घराचे स्वप्न धुळीस मिसळले आहे. घराचे अपुरे बांधकाम असल्याने घरकुल लाभार्थ्यांना ऊन, वारा, पाऊस, पाणी, झोपडीत राहून मरण यातना भोगत रेतीची प्रतीक्षा करावी लागत आहे. आपण या घटनेवर अधिक लक्ष देऊन प्रभावी कारवाई करून येथील जनतेला दिलासा द्यावा, अन्यथा संपूर्ण घरकुल लाभार्थ्यांना घेऊन तीव्र स्वरूपाचे आंदोलन करावे लागेल, याकरिता आपणास सन्मानपूर्वक निवेदन सादर.
Wani, Yavatmal.