वाशिम : दिवाळीचा प्रकाश,गोडधोड फराळ आणि कपडे सगळ्यांच्याच नशिबात असते असं नाही पण अशाच वंचित घटकांची दिवाळी प्रकाशमय आनंदी आणि गोडधोड व्हावी यासाठी एक ऊब जाणिवेची ने तब्बल २५१ अशाचं अंधारमय घरात दिवाळीत प्रकाश पेरला. प्रत्येक जण आपल्या संसारात आपल्या कामात इतका गुरफटून गेलेला असतो की कित्येकांचे दु:ख,दारिद्रय, दैन्य पाहायला पण वेळ नसतो.पण अशीच समविचारी लोक एकत्र आली की ज्यांना इतरांचे दुःख पाहून दुःख वाटायचे डोळ्यात पाणी यायचे आणि स्थापना झाली एका समूहाची एक ऊब जाणिवेची ……सुरुवातीच्या काळात लोकांच्या घरातील जुनी पण चांगली व्यवस्थित कपडे समूहातील लोकांनी गोळा करायला सुरुवात केली.ती स्वच्छ करून शिवून व्यवस्थितपणे गरजू वंचित घटकांपर्यंत पोहोचण्याचे काम एक ऊब जाणिवेच्या परिवाराने केले.मग कोरोणा सुरू झाला आणि जुने कपडे गोळा करणे आणि वाटणे हे धोकादायक वाटायला लागले.मग सदस्य छोटेखानी रक्कम समूहात जमा करायला लागले आणि जमलेल्या पैशातूनच मग वंचित घटकांसाठी कपडे व अत्यंत गरजू लोकांना किराणा वाटण्याचं काम सुरू झाले.
समूहातील काही दानशूर व्यक्ती आपल्या स्वत:च्या, मुलामुलींच्या,पत्नीच्या,आई वडिलांच्या वाढदिवसानिमित्त तर काही आईवडलांच्या स्मृतिदिनानिमित्त पण रक्कम जमा करायला लागले तेरवीवर होणारा खर्च काही लोक द्यायला लागले. सुरुवातीला एका कुटुंबापासून सुरूवात झालेली दत्तक कुटूंब योजना आज ८० कुटुंबांपर्यंत पोहोचलेली आहे.यासाठी कुटूंबांना महिनाभर लागणारा किराणा,कपडे व औषधोपचार मोफत केला जातो.सदस्यांच्या लक्षात असे यायला लागलं की अनेक कुटुंबांची दिवाळी ही पैशाअभावी वस्तूंंअभावी अंधारातच जाते.गरीब, दरिद्री, कष्टी, अनाथ असा मोठा दुःखी वर्ग समाजात आहे.आपल्या घरी दिवाळी साजरी करताना त्यांच्याही घरी आनंदाचा एक दिवा लावावा म्हणजे त्यांच्या चेहऱ्यावर देखील आनंदाची रेषा पसरेल.या दुःखी कष्टी लोकांच्या चेहऱ्यावर हास्य पसरवणे हे आपल्या सर्वांचे कर्तव्यच आहे.साने गुरुजी म्हणतात त्याप्रमाणे बाहेर अनंत दिवे पाजळून दिवाळी येत नसते. हृदयात प्रेमाच्या,मानवतेच्या पणत्या लावून आनंदाची उधळण करणाऱ्या या सणातून आपल्या जीवनात प्रकाश आणू या!अशी दिवाळी साजरी झाली तरच खऱ्या अर्थाने दिवाळी साजरी झाली असे म्हणता येईल अन्यथा नाही!..आणि मग सुरू झाला प्रवास मिशन दिवाळी.हे वाटप प्रत्यक्ष लाभार्थ्यांच्या घरीचं जाऊन केले गेले कारण यातला लाभार्थी हा आपल्या गावातून बाहेर जाऊ शकत नाही कारण एक तर अपंग,मनोरुग्ण किंवा खूप थकलेले लोकचं हे एक ऊब जाणिवेची चे लाभार्थी आहेत. एक ऊब जाणिवेची च्या माध्यमातून तब्बल २५१ कुटुंबांना दिवाळीचा किराणा गोडधोड फराळ व कपडे पुरविण्यात आले.दिवाळीत गोडधोड फराळ,किराणा व कपड्यांचे वाटप वाशीम यवतमाळ जिल्हयांमधील अंतरखेड,पारवा कोहर, पोहा,शहा,वालई,बाबापुर, कामरगाव,विळेगाव,बेंबळा,भूलोडा,उंबर्डा बाजार,कामठवाडा,पिंप्री वरघट,दादगाव,पिंपळगाव गुंजाटे,वाई,वढवी,पिंपळगाव, हांडे,तपोवन,नागी,शेलुबाजार,येडशी,वाडा,जांब,वरुड (बु),वरुड (खु),हिसई,मंगरूळपीर,शेलगाव,शिवणी(द),सायखेडा,झोडगा, भामदेवी,धनज,धोत्रा (जहां),हिंगणवाडी,मेहा,दोनद, धोत्रा(देशमुख),अलीमर्दापुर,इंझोरी,दापुरा,जनुना,कुपटा,सोयजना,पंचाळाभुली,सोमठाणा,माहुली,गिरोली,तळप,मानोरा,अभयखेडा,कोंडोली,पारवा,मोरखेड,गलमगाव धानोरा(ता),गायवळ,येवता (बंदी),शेलुवाडा,धामणी (खडी),चेहेल,एकांबा खडी,कारंजा,काजळेश्वर या ६५ तर पालघरमधील सोनावे,पारगाव,खडकोली,लालठाणे,बोरीचा पाडा,रोडखड,सफाळा या ७ गावांमध्ये २० कुटुंबाना करण्यात आले.
कारंजा पासून जवळपास ६००कि.मी.दूर वर असलेल्या पालघर जिल्हयातही काम चाललेले आहे.जवळपास ७ गावातील अत्यंत गरजवंत कुटुंबांना किराणा,कपडे,फराळ,मिठाई वाटून एक ऊब जाणिवेची दिवाळी मिशन २०२२ अंतर्गत मदत केली हे विशेष.एक ऊब जाणिवेची या संस्थेवर विश्वास दाखवुन महाराष्ट्रासह गोवा, गुजरात,इंग्लड, दुबई,जर्मनी व दक्षिण आफ्रिका सारख्या भागातुनही मदत येते.
फुलचंद भगत