नागपूर: नागपूर ग्रामीणच्या उमरेड विभागांतर्गत कुही फाट्याजवळील ‘रेस्पिरो’ हॉटेलमध्ये अवैधरीत्या दारू आणि हुक्का सुरू असल्याची माहिती मिळाल्यानंतर पोलिसांनी शनिवारी रात्री उशिरा छापा टाकला. या कारवाईत पोलिसांनी ₹१ लाख २ हजार ६५० किमतीचा मुद्देमाल जप्त केला आहे.
नागपूर ग्रामीणचे पोलीस अधीक्षक हर्ष पोद्दार आणि अपर पोलीस अधीक्षक अनिल मस्के यांच्या मार्गदर्शनाखाली, उपविभागीय पोलीस अधिकारी वृष्टी जैन यांच्या नेतृत्वाखालील पथकाने १७ ऑगस्ट रोजी रात्री १२:२० वाजता ही कारवाई केली. हॉटेलची तपासणी केली असता, तिथे कोणत्याही परवान्याशिवाय ग्राहकांना दारू आणि हुक्का पुरवला जात असल्याचे उघड झाले.
पोलिसांनी पंचनामा करत दारूच्या बाटल्या, १४ हुक्का पॉट्स आणि ग्राहकांसाठी असलेल्या प्लास्टिकच्या खुर्च्या असा लाखोंचा मुद्देमाल जप्त केला.
या प्रकरणी पोलिसांनी हॉटेल मालक अमितकुमार ओम प्रकाश रॉय, राहुल कटकवार, हॉटेल मॅनेजर सतीश तापेश्वर शर्मा आणि किचन मॅनेजर सुनील इंद्रबहादूरसिंग ठाकूर यांच्या विरोधात महाराष्ट्र दारूबंदी कायद्यान्वये गुन्हा दाखल केला आहे. या प्रकरणाचा पुढील तपास पोलीस उपनिरीक्षक धीरज मसराम करत आहेत.