अहिल्यानगर: अहिल्यानगर महापालिकेच्या आरोग्य विभागातील १६.५० लाख रुपयांच्या अपहार प्रकरणात निलंबित झालेले वैद्यकीय आरोग्याधिकारी डॉ. अनिल बोरगे यांना मोठा दिलासा मिळाला आहे. मुख्य जिल्हा न्यायाधीश अंजु शेंडे यांनी त्यांना या गुन्ह्यातून दोषमुक्त करण्याचा आदेश दिला आहे. यामुळे या प्रकरणातील गुन्ह्यातून त्यांचे नाव वगळले गेले आहे.
गेल्या वर्षी आरोग्य विभागातील अपहार प्रकरणात डॉ. बोरगे यांच्यासह एका कर्मचाऱ्याला अटक करण्यात आली होती. त्यानंतर तपास करणाऱ्या कोतवाली पोलीस ठाण्याचे निरीक्षक प्रताप दराडे यांनी डॉ. बोरगे यांचा गुन्ह्यात थेट सहभाग नसल्याचा अहवाल कनिष्ठ न्यायालयात सादर केला होता, मात्र तो फेटाळला गेला होता.
त्यानंतर डॉ. बोरगे यांनी या निर्णयाविरोधात जिल्हा व सत्र न्यायालयात ‘पुनरीक्षण’ अर्ज दाखल केला. या अर्जावर सुनावणी होऊन न्यायालयाने तो अर्ज मंजूर केला. त्यामुळे, डॉ. अनिल बोरगे यांचे नाव या गुन्ह्यातून वगळण्याचा आदेश देण्यात आला.
या प्रकरणातून डॉ. बोरगे यांच्यावरील आरोप सिद्ध झाले नाहीत, ज्यामुळे त्यांना आता निर्दोष घोषित करण्यात आले आहे. या कायदेशीर लढाईत डॉ. बोरगे यांच्यावतीने ॲड. सुधीर बाफना यांनी काम पाहिले. या निर्णयानंतर त्यांच्या निलंबनाबद्दल पुढील कार्यवाही काय होते, याकडे आता सर्वांचे लक्ष लागून आहे.
एनटीव्ही न्यूज मराठी, अहिल्यानगर.