भूम (महाराष्ट्र): भूम तालुक्यातील मात्रेवाडी येथे एक हृदयद्रावक घटना उघडकीस आली आहे. मौजे मात्रेवाडी येथील अल्पभूधारक शेतकरी लक्ष्मण बाबासाहेब पवार (वय अंदाजे) यांनी २४ सप्टेंबर रोजी सकाळी आपल्या गोठ्यात गळफास घेऊन आत्महत्या केल्याची माहिती समोर आली आहे. कर्जबाजारीपणामुळेच त्यांनी हे टोकाचे पाऊल उचलल्याचा प्राथमिक अंदाज आहे.
कुटुंबावर दुःखाचा डोंगर
लक्ष्मण पवार यांच्या पश्चात पत्नी, आई आणि तीन मुले (रोहन, रोहित आणि अक्षय) असा परिवार आहे. आपल्या आणि आईच्या नावावरील अल्प जमिनीमध्ये ते पारंपारिक शेती करत होते. या वर्षी त्यांनी काही क्षेत्रांमध्ये कांदा तर उर्वरित भागात सोयाबीन पीक लावले होते.
कुटुंबाचा उदरनिर्वाह केवळ शेतीवर होत नसल्याने आणि मुलांना रोजगार मिळावा तसेच कुटुंबाला आर्थिक आधार देण्यासाठी त्यांनी कर्ज घेण्याचा निर्णय घेतला. त्यांनी ॲक्सिस बँक मार्फत एक ट्रॅक्टर आणि इतर बँकांकडून दुसरा ट्रॅक्टर कर्ज रूपाने घेतला होता.
कर्जाचा वाढता बोजा आणि नैसर्गिक आपत्तीचा दुहेरी फटका
लक्ष्मण पवार यांच्यावर ट्रॅक्टरच्या कर्जापोटी सुमारे १५ लाखांची रक्कम हप्त्यांद्वारे बँकेला भरायची होती. त्यातच, त्यांच्या दोन गाई मरण पावल्या आणि यावर्षीच्या अतिवृष्टीमुळे शेतीचे मोठे नुकसान झाले, पिकं वाहून गेली. यामुळे ट्रॅक्टरचे कर्ज आणि सोसायटीचे कर्ज कसे फेडायचे, या विवंचनेत ते पूर्णपणे बुडून गेले होते.
आई जिजाबाई पवार यांनी दिलेल्या माहितीनुसार, या चिंतेपोटी लक्ष्मण पवार कुटुंबातील सदस्यांशी दोन दिवसांपासून बोलत नव्हते. आत्महत्येच्या एक दिवस अगोदर त्यांनी जेवणही केले नव्हते.
शेवटी, दुसऱ्या दिवशी सकाळी त्यांनी घरापासून १०० मीटर अंतरावर असलेल्या गाय गोठ्यात जाऊन गळफास घेत आपली जीवनयात्रा संपवली. लक्ष्मण पवार यांच्या तिन्ही मुलांचे अद्याप लग्न झालेले नाही, त्यामुळे कुटुंबावर मोठा आघात झाला आहे.
या घटनेमुळे मात्रेवाडी गावात हळहळ व्यक्त होत आहे.
प्रतिनिधी: गौस शेख, भूम