- अण्णाभाऊ साठे यांच्या पूर्णाकृती पुतळ्यासाठी मातंग समाजाची तीव्र मागणी.
अमरावती: साहित्य सम्राट, लोकशाहीर डॉ. अण्णाभाऊ साठे यांचा पूर्णाकृती पुतळा अमरावती येथे गर्ल्स हायस्कूल चौकाच्या बाजूला असलेल्या शाळेच्या आत शासनमान्य जागेवर बसवण्याच्या मागणीसाठी सकल मातंग समाजाने आज अमरावती महानगरपालिकेच्या आयुक्त कार्यालयाबाहेर पालकमंत्री बावनकुळे यांना घेराव घालून निवेदन दिले.
यावेळी समाजाने आपली तीव्र भावना पालकमंत्र्यांपुढे व्यक्त केली. सागर कलाने, पंकज जाधव आणि गणेशदास गायकवाड यांनी पालकमंत्र्यांना २५ वर्षांपासून प्रलंबित असलेल्या या विषयाची सत्य परिस्थिती व्यवस्थित समजावून सांगितली. महानगरपालिका या कामात कसूर करत असल्यामुळे विलंब होत असल्याचेही त्यांनी स्पष्ट केले.
पालकमंत्र्यांनी दिले आयुक्तांना आदेश
मातंग समाजाच्या भावना आणि विषयाचं गांभीर्य लक्षात घेऊन पालकमंत्र्यांनी तत्काळ अमरावती महानगरपालिकेच्या आयुक्तांना या संदर्भात पत्र रिमार्क करून आदेश दिले.
पुतळ्याची मागणी का?
यावेळी सागर कलाने यांनी समाजाची ठाम भूमिका मांडली. साहित्य रत्न लोकशाहीर अण्णाभाऊ साठे यांच्या कार्याची दखल घेऊन त्यांच्या स्मृतीस कायमस्वरूपी आदर मिळावा आणि समाजातील नव्या पिढीला त्यांच्यापासून प्रेरणा मिळावी, यासाठी हा पुतळा लवकरात लवकर उभा करणं गरजेचं आहे, असे त्यांनी सांगितले. अण्णाभाऊ साठे यांनी साहित्यातून आणि लोकशाहिरीतून समाजाला दिलेले योगदान अमूल्य आहे. त्यामुळे त्यांच्या पुतळ्यासाठी अनेक वर्षांपासून सुरू असलेला हा संघर्ष आतातरी थांबावा, अशी समाजाची अपेक्षा आहे.
उपस्थित समाज बांधव
यावेळी प्रामुख्याने सागर कलाने, पंकज जाधव, गणेशदास गायकवाड, शंकरराव खंडारे, सुरेश खंडारे, वैभव इंगोले, रोशन जोंधळे, सागर लोखंडे, आकाश खडसे, गौरव गवळी, शुभम राऊत, जयकांत स्वर्ग, कृष्णा गुगलमाने, दिलीप आमटे, प्रदीप साठे व सुमित कलाने यांच्यासह अनेक समाज बांधव मोठ्या संख्येने उपस्थित होते. सकल मातंग समाजाने एकत्र येऊन दाखवलेल्या या एकजुटीमुळे या मागणीला आणखी बळ मिळालं आहे.
आता पालकमंत्र्यांच्या आदेशानंतर अमरावती महानगरपालिका या विषयावर काय पाऊल उचलते, याकडे सर्वांचे लक्ष लागले आहे.
एनटीव्ही न्यूज मराठी, अमरावती.