- राजकारणात पक्ष प्रवेश पण शेतकऱ्यांचे पैसे कुठे..?
- मातोश्री शुगर कारखान्याचा काळा कारनामा..
तुळजापूर (प्रतिनिधी):
अक्कलकोटचे माजी आमदार सिद्धाराम म्हेत्रे यांच्या मातोश्री शुगर कारखान्याने तुळजापूर तालुक्यातील असंख्य शेतकऱ्यांचे ऊसाचे पैसे थकवले आहेत. महिनोनमहिने बिले न मिळाल्याने शेतकरी आर्थिक संकटात सापडले असून अक्षरशः आत्महत्येच्या मार्गावर ढकलले जात आहेत.
अतिवृष्टीच्या मोठ्या संकटामुळे पिकं उध्वस्त झाली, आणि वरून ऊसाचे बिल न मिळाल्याने शेतकऱ्यांसमोर “जगायचं कसं?” असा जळजळीत प्रश्न उभा ठाकलाय.
दरम्यान, मातोश्री शुगर कारखान्यावरील थकीत कर्ज वसुलीसाठी युनिटी बँक ऑफ इंडियाने मालमत्ता जप्त करून कारवाई केली असली तरीही शेतकऱ्यांचे बिल मात्र दिले गेलेले नाही. शेतकऱ्यांच्या घामाच्या पैशांवर डल्ला मारून कारखानदार स्वतःचे राजकारण फुलवत आहेत, असा आरोप संतप्त शेतकरी करत आहेत.
नुकतेच मुख्यमंत्री एकनाथ शिंदे यांनी सिद्धाराम म्हेत्रे यांना पक्षप्रवेश दिला. मात्र, शेतकऱ्यांचे कोट्यवधींचे पैसे थकले असतानाच त्यांचा पक्षप्रवेश झाल्याने शेतकऱ्यांचा रोष अधिक भडकला आहे.
“आमची ऊस बिले तात्काळ मिळाली नाहीत, तर याची जबाबदारी थेट माजी आमदारांवरच राहील. शेतकऱ्यांना आत्महत्येच्या दारात नेणाऱ्या कारखानदारांवर साखर आयुक्तांनी तात्काळ कारवाई केली नाही, तर अशा लोकांना जिवंत राहण्याचा अधिकारच नाही!” अशी आक्रमक भूमिका शेतकऱ्यांनी घेतली आहे.
प्रतिनिधी अय्युब शेख,
एनटीव्ही न्यूज मराठी, तुळजापुर, धाराशीव.