AHILYANAGAR |
🚨 अपहरण, खंडणी आणि धमक्या! थरार नाट्य संपले; स्थानिक गुन्हे शाखेने उचलले मोठे पाऊल! 🚨

> खंडणीसाठी अपहरण करून जिवे ठार मारण्याची धमकी.

> १० लाखांची खंडणी मागितली.

> तांत्रिक विश्लेषण आणि व्यावसायिक कौशल्याच्या आधारे पुणे येथून टोळी जेरबंद.

> चार आरोपींना राहुरी पोलिसांच्या स्वाधीन, पुढील तपास सुरू.

फिर्यादी बापुसाहेब रामदास गागरे यांना १३ ऑक्टोबर २०२५ रोजी वाकडी येथे जात असताना, एका पांढऱ्या रंगाच्या चारचाकी वाहनातून पाठलाग करून निळवंडे कॅनलजवळ काही आरोपींनी अडवले. हत्याराचा धाक दाखवून त्यांना जिवे ठार मारण्याची धमकी देत बळजबरीने गाडीत बसवले. त्यानंतर एका निर्जन गोडाऊनमध्ये नेऊन त्यांना मारहाण करण्यात आली आणि त्यांच्याकडे १० लाखांची खंडणी मागण्यात आली.

फिर्यादीने पैसे देण्याचे कबूल केल्यानंतर आरोपींनी त्यांच्या डोळ्याला पट्टी बांधून चारचाकी वाहनातून त्यांना शनिशिंगणापूर फाट्याजवळ सोडून दिले. त्यानंतर आरोपींनी वारंवार फोन करून खंडणी कधी देणार असे विचारले, पैसे न दिल्यास कुटुंबाला ठार मारण्याची धमकी दिली. या घटनेनंतर राहुरी पोलीस स्टेशनमध्ये गुन्हा दाखल करण्यात आला होता. गुन्हा दाखल झाल्यानंतर स्थानिक गुन्हे शाखेचे पोलीस निरीक्षक किरणकुमार कबाडी यांनी उपनिरीक्षक संदीप मुरकुटे यांच्या नेतृत्वाखाली एक पथक तयार केले आणि आरोपींचा शोध सुरू केला. १७ नोव्हेंबर २०२५ रोजी या पथकाला तांत्रिक विश्लेषण व व्यावसायिक कौशल्याच्या आधारे माहिती मिळाली की, ओम अशोक ठोंबरे आणि अजय शंकर हुलावळे यांनी त्यांच्या साथीदारांसह हा गुन्हा केला असून ते कोथरूड, पुणे येथे आहेत. पथकाने तात्काळ पुणे गाठून आरोपींना ताब्यात घेतले. चौकशीदरम्यान आरोपींनी त्यांच्या इतर साथीदारांसह गुन्हा केल्याची कबुली दिली. आरोपींकडून १,१९,२००/- रुपये किमतीचा मुद्देमाल जप्त करण्यात आला आहे. ताब्यात घेतलेल्या चार आरोपींना पुढील तपासासाठी राहुरी पोलीस स्टेशनच्या स्वाधीन करण्यात आले आहे. या प्रकरणातील दोन आरोपी अद्याप फरार आहेत. ही कारवाई पोलीस अधीक्षक श्री. सोमनाथ घार्गे यांच्या सूचनेनुसार स्थानिक गुन्हे शाखेने केली आहे.

एनटीव्ही न्यूज मराठी, अहिल्यानगर.