हायवेवरचा थरार संपला! चालत्या कंटेनरमधून टायर लंपास करणारी टोळी जेरबंद..!

• धाराशिव एलसीबीची ‘फिल्मी स्टाईल’ कारवाई; ८ लाखांहून अधिकचा मुद्देमाल जप्त..!

धाराशिव प्रतिनिधी | दि: २२ जानेवारी

धाराशिव: सोलापूर-धुळे महामार्गावर चालत्या कंटेनरमधून सामानाची लूट करून दहशत माजवणाऱ्या टोळीचा धाराशिव पोलिसांनी पर्दाफाश केला आहे. स्थानिक गुन्हे शाखेने (LCB) अत्यंत धाडसी पद्धतीने सापळा रचून दोन सराईत गुन्हेगारांच्या मुसक्या आवळल्या असून, त्यांच्याकडून टायर आणि चोरीच्या दुचाकींसह सुमारे ८ लाख २८ हजार ६५९ रुपयांचा मुद्देमाल हस्तगत केला आहे.

काय होते प्रकरण?

२४ डिसेंबर २०२५ रोजी रामजी यादव या ट्रक चालकाचा कंटेनर महामार्गावरून जात असताना, या टोळीने चालत्या वाहनातून मोठ्या शिताफीने नवीन टायर लंपास केले होते. या हायवे चोरीमुळे वाहनचालकांमध्ये भीतीचे वातावरण होते. पोलीस निरीक्षक विनोद इज्जतपवार यांना या टोळीबद्दल गुप्त माहिती मिळाली होती.

थरारक पाठलाग आणि अटक

२१ जानेवारी २०२६ रोजी गुन्हे शाखेचे पथक गस्तीवर असताना अनिल मच्छिंद्र पवार आणि नाना तानाजी शिंदे हे दोन संशयित पोलिसांच्या नजरेस पडले. पोलिसांनी त्यांना थांबवण्याचा इशारा केला असता, त्यांनी पळ काढण्याचा प्रयत्न केला. मात्र, पोलिसांनी ‘फास्ट अँड फ्युरियस’ स्टाईलने पाठलाग करून दोघांनाही झडप घालून ताब्यात घेतले.

जप्त केलेला मुद्देमाल

आरोपींच्या चौकशीतून महामार्गावरील चोऱ्यांसह दुचाकी चोरीचेही गुन्हे उघडकीस आले आहेत. पोलिसांनी खालील मुद्देमाल जप्त केला:

• २९ नग नवीन टायर: कंटेनरमधून चोरलेले ब्रँडेड टायर.
• ०४ चोरीच्या मोटारसायकली: वाशी, बेंबळी आणि येरमाळा परिसरातून चोरलेल्या दुचाकी.
• गुन्ह्यात वापरलेले चारचाकी वाहन: ज्याचा वापर हायवेवर चोरीसाठी केला जात असे.
• रोख रक्कम: गुन्ह्यातील व्यवहारातून मिळालेली रोकड.

पोलीस प्रशासनाची मोठी कामगिरी

ही धडाकेबाज कारवाई पोलीस अधीक्षक श्रीमती रितु खोखर, अप्पर पोलीस अधीक्षक श्रीमती शफकत आमना यांच्या थेट मार्गदर्शनाखाली करण्यात आली. महामार्गावर धुमाकूळ घालणारी ही टोळी गजाआड झाल्याने ट्रक चालक आणि प्रवाशांनी सुटकेचा निश्वास सोडला आहे. या टोळीचे आणखी काही सदस्य किंवा इतर गुन्हे उघडकीस येण्याची शक्यता पोलिसांनी वर्तवली आहे.

प्रतिनिधी आयुब शेख, धाराशिव.