कोरोना: हिवरेबाजारचा कोरोनामुक्ती पॅटर्न आहे तरी काय?

भारताचे पंतप्रधान नरेंद्र मोदी यांनी नुकताच देशातील 11 राज्यातील 60 जिल्हाधिकाऱ्यांशी व्हीडिओ कॉन्फरंसिंगच्या माध्यमातून संवाद साधला. यात अहमदनगरचे जिल्हाधिकारी डॉ. राजेंद्र भोसले यांनी हिवरेबाजारने कशा पद्धतीने गाव कोरोनामुक्त केले याची माहिती दिली.

अहमदनगर जिल्ह्याच्या ग्रामीण भागात कोरोनाचा वेगाने प्रसार होत असताना 1 मे पासून हिवरेबाजारमध्ये कोरोनाचा नवीन एकही रुग्ण आढळून आलेला नाही. त्यामुळे हिवरेबाजारचा कोरोनामुक्तीचा पॅटर्न कुठला आहे, ते जाणून घेऊयात.

हिवरेबाजारची लोकसंख्या साधारण 1700 च्या आसपास. दुसऱ्या लाटेत गावात 47 जणांना कोरोनाची लागण झाली. गेल्या लाटेत देखील काही जणांना कोरोनाची लागण झाली होती. परंतु त्यावेळी देखील गावाने कोरोनावर मात केली होती. दुसऱ्या लाटेत मार्चमध्ये पुन्हा कोरोनाचे रुग्ण आढळण्यास सुरुवात झाली. गावाने चार पथके तयार केली.