गडचिरोली-चिमूर लोकसभा क्षेत्राचे खासदार डॉ. नामदेव कीरसान यांच्याबाबत सोशल मीडियावर एक पोस्टर व्हायरल होत आहे. निवडणुकीपूर्वी विविध कार्यक्रमांना उपस्थित राहणारे खासदार आता जनतेपासून दूर असल्याचा दावा या पोस्टरमधून करण्यात आला आहे.
धानोरा, गडचिरोली येथून समोर आलेल्या या पोस्टरमध्ये खासदार डॉ. नामदेव कीरसान यांच्यावर विविध सवाल उपस्थित करण्यात आले आहेत.
निवडणुकीपूर्वी लग्नकार्य, बारसे, तेरवी, चौदावी, नाटक, दंडार अशा विविध कार्यक्रमांना खासदार आवर्जून उपस्थित राहत होते. मात्र, मागील एक ते दीड वर्षांपासून त्यांनी कायमची दांडी मारल्याचा दावा पोस्टरमधून करण्यात आला आहे.
त्यामुळे जनतेच्या समस्या कुणाकडे मांडायच्या, असा सवाल उपस्थित करण्यात आला आहे.
खासदारांनी किती शासकीय बैठका घेतल्या, जनतेच्या प्रश्नांवर किती पाठपुरावा केला आणि किती प्रश्न मार्गी लागले, याचाही हिशोब द्यावा, अशी मागणी पोस्टरमधून करण्यात आली आहे.
निवडणुकीपूर्वी त्यांच्या कार्यकर्त्यांकडून खासदारांच्या शिक्षणाबाबत आणि जनतेच्या पाठीशी उभे राहण्याबाबत करण्यात आलेल्या दाव्यांचाही पोस्टरमध्ये उल्लेख करण्यात आला आहे. आता ते कुठे आहेत, असाही सवाल उपस्थित करण्यात आला आहे.
दरम्यान, हे सर्व दावे आणि आरोप सोशल मीडियावर व्हायरल झालेल्या पोस्टरमधून करण्यात आले आहेत. या आरोपांबाबत खासदार डॉ. नामदेव कीरसान यांची प्रतिक्रिया या वृत्तात उपलब्ध नाही.
अभय इंदुरकर | एनटीव्ही न्यूज मराठी | धानोरा, गडचिरोली