YAVATMAL | 😡 ४ वर्षाच्या चिमुकलीवरील अत्याचार, हत्येप्रकरणी सुवर्णकार समाज आक्रमक; नराधमाला कठोर शिक्षेची मागणी 😡

• नाशिक जिल्ह्यातील डोंगराळे गावात घडलेल्या अमानुष घटनेबद्दल उमरखेडमध्ये संताप.
  
• सुवर्णकार समाजातर्फे उपविभागीय अधिकाऱ्यास मुख्यमंत्र्यांसाठी निवेदन सादर.
  
• विकृत गुन्हेगारास कठोरात कठोर शासन करण्याची व खटला फास्टट्रॅक कोर्टात चालवण्याची मागणी.
  
• पीडित कुटुंबाला शासनातर्फे संरक्षण आणि आर्थिक मदत देण्याची मागणी.

नाशिक जिल्ह्यातील डोंगराळे गावात सुवर्णकार समाजातील चार वर्षाच्या चिमुकलीवर त्याच गावातील विजय खैरनार नावाच्या राक्षसी वृत्तीच्या तरुणाने अत्याचार केला व अत्यंत अमानुषपणे दगडाने ठेचून तिची निर्घृण हत्या केली. या विकृत मनोवृत्तीच्या गुन्हेगारास कठोरात कठोर शासन करणेबाबत उमरखेड सुवर्णकार समाजातर्फे मा. मुख्यमंत्री देवेंद्रजी फडणवीस यांना उपविभागीय अधिकारी, उमरखेड यांच्यामार्फत निवेदन सादर करण्यात आले.

एका चिमुरडीसोबत असे नीच कृत्य करणाऱ्या विकृत व पाशवी मनोवृत्तीच्या आणि माणुसकीला काळीमा फासणाऱ्या नराधमाचा उमरखेड येथील समस्त सुवर्णकार समाजाच्या वतीने जाहीर व तीव्र निषेध करण्यात आला. या निंदनीय, पाशवी व अमानवीय घटनेसंदर्भात समस्त सोनार समाजात चीड व संतापाची भावना असून, गुन्हेगारावर शीघ्र कार्यवाही न झाल्यास संपूर्ण महाराष्ट्रात भावनांचा तीव्र उद्रेक होऊ शकतो, याची प्रशासनाने गंभीर दखल घ्यावी, अशी विनंती समाजातर्फे निवेदनात करण्यात आलेली आहे. त्यासोबतच, घडलेल्या घटनेच्या तपासात कुठलीही त्रुटी न ठेवता योग्य व शीघ्रगतीने तपास होऊन आरोपपत्र त्वरित न्यायालयात दाखल व्हावे व हा खटला शीघ्रगती विशेष न्यायालयात (फास्टट्रॅक कोर्ट) चालवावा. मुख्य गुन्हेगार तसेच आरोपीस सहकार्य करणाऱ्यांवर देखील सहआरोपी करून कार्यवाही करावी, तसेच चिमुरडीच्या कुटुंबाला शासनातर्फे संरक्षण व आर्थिक सहाय्य प्रदान करण्यात यावी, अशी मागणी निवेदनात करण्यात आली.

याप्रसंगी सुवर्णकार समाजाचे अध्यक्ष श्री. सुनील टाक, सराफ असोसिएशन अध्यक्ष सतीश श्रीरामजवार, समाजाचे उपाध्यक्ष सुनील उदावंत, सचिव राम बोकन, कोषाध्यक्ष कैलास उदावंत, संचालक दिलीप शहाणे, अनिल नाशिककर, अतुल उदावंत, देविदास शहाणे, योगेश बोकण, अतुल पत्तेवार, अतुल मैड, शंकरराव काळे व सुवर्णकार समाजातील सर्व समाज बांधव उपस्थित होते.

एनटीव्ही न्यूज मराठी, उमरखेड, यवतमाळ