प्रारूप मतदार यादीवर मोघम तक्रारी न करता ब नमुना अर्जाद्वारे हरकत घ्यावी
हरकतींसाठी राज्य निवडणूक आयोगाकडून ३ डिसेंबरपर्यंत मुदतवाढ
आयुक्त तथा प्रशासक यशवंत डांगे यांची माहिती
अहिल्यानगर – अहिल्यानगर महानगरपालिकेच्या प्रारूप मतदार यादीवर आलेल्या हरकतींवर पडताळणी करून व स्थळ पाहणी करून निर्णय घेतला जात आहे. प्रभागांच्या सीमेवरील काही नावे एकाच भाग यादीत असल्याने ती शेजारील प्रभागात गेली असण्याची शक्यता आहे. याबाबत गांभीर्यपूर्वक तपासणी करण्यात येत आहे. मात्र, काही राजकीय कार्यकर्ते मोघम स्वरूपाच्या तक्रारी करून चुकीचे आरोप करत आहेत. प्रक्रियेबाबत दिशाभूल करणारी माहिती पसरवून चुकीच्या मागण्या केल्या जात आहेत. मतदार यादीतील नावाबाबत हरकती दाखल करण्यासाठी मतदार व तक्रारदारांसाठी स्वतंत्र अर्ज आहेत. ज्या तक्रारदारांना हरकत घ्यायची असेल त्यांनी ब नमुना अर्जाद्वारे हरकत दाखल करावी. तसेच, हरकती दाखल करण्यासाठी राज्य निवडणूक आयोगाने ३ डिसेंबरपर्यंत मुदत वाढवून दिली असल्याची माहिती आयुक्त तथा प्रशासक यशवंत डांगे यांनी दिली आहे.
महानगरपालिकेच्या कर्मचाऱ्यांमार्फत प्रभागनिहाय मतदार याद्या तयार करण्यात आल्या आहेत. या कामासाठी कोणत्याही खासगी व्यक्तीची नियुक्ती करण्यात आलेली नाही. त्यामुळे याबाबत होत असलेले आरोप खोटे व अफवा पसरवणारे आहेत. प्रारूप मतदार यादी राज्य निवडणूक आयोगाने जाहीर केलेल्या वेळापत्रकानुसार प्रसिद्ध करण्यात आली आहे. त्याच दिवशी महानगरपालिकेच्या संकेतस्थळावर यादी प्रसिद्ध करण्यात आली होती. मतदारांच्या छायाचित्रासह असलेली यादी माहिती सुविधा केंद्रात त्याच दिवशी उपलब्ध करण्यात आली आहे. काही प्रभागांच्या याद्यांची मागणी वाढल्याने आवश्यकतेनुसार त्याची छपाई करून याद्या उपलब्ध करण्यात आलेल्या आहेत. त्यामुळे उशिराने यादी प्रसिद्ध करण्यात आल्याची तक्रार चुकीची आहे.
हरकती दाखल करण्यासाठीचे मतदार व तक्रारदारांचे स्वतंत्र अर्ज, हरकती कोठे जमा करायच्या याची माहिती अधिकाधिक नागरिकांपर्यंत, मतदारांपर्यंत पोहोचावी यासाठी अधिकृतपणे संकेतस्थळावर, तसेच महानगरपालिकेच्या अधिकृत फेसबुक पेजवर प्रसिद्ध करण्यात आली आहे. त्यामुळे प्रारूप मतदार यादीवर हरकती दाखल करण्यासाठी मतदार व तक्रारदारांसाठी उपलब्ध असलेल्या अर्जानुसार हरकती दाखल कराव्यात. मोघम स्वरूपाच्या तक्रारींची दखल घेतली जाणार नाही, असेही आयुक्त तथा प्रशासक यशवंत डांगे यांनी स्पष्ट केले आहे.
तसेच, राज्य निवडणूक आयोगाने मतदार यादीचा सुधारीत कार्यक्रम जाहीर केला आहे. त्यानुसार हरकती दाखल करण्यासाठी ३ डिसेंबरपर्यंत मुदत वाढवून देण्यात आली आहे. त्यावर निर्णय होऊन १० डिसेंबर रोजी अंतिम मतदार यादी प्रसिद्ध केली जाणार आहे. तसेच, १५ डिसेंबर रोजी मतदान केंद्रांची यादी प्रसिद्ध केली जाणार आहे. तर, २२ डिसेंबर रोजी मतदान केंद्रनिहाय मतदार यादी प्रसिद्ध करण्यात येणार आहे.