स्थानिक स्वराज्य संस्था निवडणूक: काँग्रेसकडून अशोक जगदाळे यांच्या नावावर गांभीर्याने विचार; मतदारसंघात हालचालींना वेग
प्रतिनिधी : आयुब शेख | धाराशिव
धाराशिव–बीड–लातूर स्थानिक स्वराज्य संस्था मतदारसंघाच्या आगामी निवडणुकीच्या पार्श्वभूमीवर काँग्रेसचे खंबीर नेते अशोक जगदाळे यांच्या नावाची राजकीय वर्तुळात पुन्हा एकदा जोरदार चर्चा सुरू झाली आहे. तुळजापूर तालुक्यातील नळदुर्ग येथील मूळ रहिवासी असलेले जगदाळे हे एक यशस्वी उद्योगपती असले, तरी त्यांनी गेल्या अनेक वर्षांत सामाजिक आणि राजकीय क्षेत्रात आपली एक स्वतंत्र व वजनदार ओळख निर्माण केली आहे.
स्थानिक राजकारणातून थेट विधानाचा प्रवास
नळदुर्ग नगरपरिषदेत एका काळी एकहाती सत्ता मिळवून त्यांनी स्थानिक राजकारणात स्वतःचा दबदबा निर्माण केला होता. त्यानंतर विधानसभा आणि नगरपालिका निवडणुकांमध्येही सक्रिय सहभाग घेत त्यांनी आपला राजकीय आलेख उंचावत ठेवला. काही निवडणुकांमध्ये त्यांना अपेक्षित यश मिळाले नसले, तरी त्यांनी आपला जनसंपर्क आणि कार्यकर्त्यांचे संघटन नेहमी मजबूत ठेवले आहे.
२०१८ मधील ऐतिहासिक लढत आणि ७३ मतांचा फरक
२०१८ मध्ये झालेल्या धाराशिव–बीड–लातूर स्थानिक स्वराज्य संस्था मतदारसंघाच्या निवडणुकीत अशोक जगदाळे यांनी चुरशीची लढत दिली होती.
अशोक जगदाळे यांना मिळालेली मते: ४५२
प्रतिस्पर्धी सुरेश धस यांना मिळालेली मते: ५२५
अवघ्या ७३ मतांच्या फरकाने त्यांचा पराभव झाला होता. मात्र, त्या निवडणुकीत त्यांनी उभा केलेला जनाधार आणि मतदारांशी जोडलेली नाळ आजही कायम आहे, अशी चर्चा राजकीय विश्लेषकांमध्ये आहे.
त्रिसदस्यीय जिल्ह्यात वाढता जनसंपर्क
गेल्या काही वर्षांत अशोक जगदाळे यांनी काँग्रेस पक्षाच्या माध्यमातून धाराशिव, बीड आणि लातूर या तिन्ही जिल्ह्यांमध्ये व्यापक जनसंपर्क वाढवला आहे. गोरगरीब, वंचित आणि उपेक्षित नागरिकांच्या अडीअडचणीला धावून जाणारे आणि समाजसेवेचा वसा जपणारे नेतृत्व म्हणून आज त्यांच्याकडे पाहिले जाते. सध्या त्यांनी तिन्ही जिल्ह्यांमध्ये कार्यकर्त्यांशी संवाद, स्थानिक बैठका आणि संघटनात्मक बांधणीवर विशेष भर दिला आहे.
उमेदवारीबाबत उत्सुकता कायम
काँग्रेस पक्षातील सूत्रांकडून मिळालेल्या माहितीनुसार, आगामी निवडणुकीसाठी अशोक जगदाळे यांच्या नावाचा अत्यंत गांभीर्याने विचार सुरू आहे. अद्याप याची अधिकृत घोषणा झाली नसली, तरी मागील निवडणुकीतील त्यांची लढाऊ प्रतिमा आणि वाढता जनसंपर्क पाहता, जगदाळे यंदा नव्या ताकदीने मैदानात उतरण्याच्या तयारीत असल्याचे स्पष्ट दिसत आहे.