AHILYA NAGAR | 🚨 वृद्ध महिलेला जीवे मारण्याची धमकी देऊन घरफोडी; अहिल्यानगर स्थानिक गुन्हे शाखेची थरारक कारवाई, आरोपी जेरबंद!

माळकुप, पारनेर येथे वृद्ध महिलेस धमकावून दागिने आणि रोख रक्कम चोरली.

पोलिसांनी तांत्रिक विश्लेषण आणि व्यावसायिक कौशल्याच्या आधारे मुख्य आरोपीला नेप्ती नाका परिसरातून पकडले.

पकडलेल्या आरोपीकडून चोरीस गेलेल्या रु. ६२,९५६/- किमतीचा मुद्देमाल जप्त करण्यात आला.

या आरोपीने आणखी तीन घरफोडीचे आणि एका मोटारसायकल चोरीचे गुन्हे केल्याची कबुली दिली.

प्रस्तुत बातमीची हकीकत अशी की, दिनांक २२/११/२०२५ रोजी रात्री ०२:०० वाजेच्या सुमारास फिर्यादी हौसाबाई कोंडाजी राहिंज (वय- ५०, रा. रहिंजवाडी माळकुप, ता. पारनेर) या त्यांच्या घरामध्ये झोपलेल्या होत्या. फिर्यादीस उठता-बसता येत नसल्याने फिर्यादीच्या सूनबाई इंदुबाई यांनी घरास बाहेरून कुलूप लावले होते. याच संधीचा फायदा घेऊन कोणीतरी अज्ञात दोन चोरट्यांनी फिर्यादी झोपलेल्या घराचे कुलूप तोडले आणि घरात प्रवेश केला. त्यांनी फिर्यादीस हाताने दाबून धरले आणि “तू गप्प पडून राहा” असे म्हणून काहीतरी वस्तूचा धाक दाखवून, “तू आरडाओरड केला तर तुला जीवे ठार मारून टाकू” असा दम दिला. त्यानंतर चोरट्यांनी फिर्यादीच्या गळ्यातील सोन्याचे दागिने व रोख रक्कम चोरून नेले. या घरफोडीच्या घटनेबाबत पारनेर पोलीस ठाण्यात गुन्हा दाखल करण्यात आला होता.

या गुन्ह्याचा तपास करण्यासाठी मा. श्री. सोमनाथ घार्गे, पोलीस अधीक्षक, अहिल्यानगर यांनी स्थानिक गुन्हे शाखेचे पोलीस निरीक्षक श्री. किरणकुमार कबाडी यांना जिल्ह्यामध्ये झालेल्या घरफोडीचे गुन्हे उघडकीस आणण्याबाबत सूचना दिल्या होत्या. त्यानुसार पो.नि. श्री. किरणकुमार कबाडी यांनी सपोनि/ हरिष भोये यांच्यासह पोलीस अंमलदार अतुल लोटके, गणेश लोंढे, फुरकान शेख, सोमनाथ झांबरे, सागर ससाणे, रोहित येमुल, आकाश काळे, बाळासाहेब गुंजाळ, मनोज साखरे, प्रशांत राठोड, चालक अरुण मोरे यांचे पथक तयार केले आणि त्यांना आरोपीचा शोध घेण्यासाठी रवाना केले.
पथकाने घटनास्थळी भेट देऊन आरोपीचा तांत्रिक विश्लेषण व व्यावसायिक कौशल्य आधारे शोध घेतला. यावेळी दिनांक ३०/११/२०२५ रोजी त्यांना माहिती मिळाली की, सदरचा गुन्हा रेकॉर्डवरील गुन्हेगार नामे गणेश रमेश काकडे (रा. पेठ आंबेगाव, ता. मंचर, जि. पुणे) याने त्याच्या साथीदारासह केला असून, तो सध्या नेप्ती नाका परिसरात फिरत आहे.

या माहितीनुसार पथकाने तात्काळ नेप्ती नाका येथे सापळा रचून आरोपी गणेश काकडे यास शिताफीने ताब्यात घेतले. त्याची चौकशी केली असता त्याने सदरचा गुन्हा मी व माझे साथीदार अक्षय उर्फ सोन्या अर्पण भोसले (फरार) आणि गंड्या अर्पण भोसले (फरार) यांनी मिळून केल्याचे कबूल केले. त्याच्याकडून चोरीस गेलेल्या सोन्याच्या धातूची मणी, कानातील कुडके, सोन्याची नथ असा एकूण रु. ६२,९५६/- किमतीचा मुद्देमाल जप्त करण्यात आलेला आहे.
याव्यतिरिक्त, आरोपी गणेश काकडे याने त्याचे वरील साथीदारांसह चाकण (जि. पुणे) येथून स्प्लेंडर मोटार सायकल चोरी, बनकुटे (ता. पारनेर) येथे कुऱ्हाडीचा धाक दाखवून सोन्याचे दागिने व रोख रक्कम बळजबरीने चोरी आणि सांगवी सुर्या (ता. पारनेर) येथील घराचे कुलूप तोडून सोन्याचे दागिने व रोख रक्कम चोरल्याचीही कबुली दिली आहे. आरोपी गणेश रमेश काकडे याच्याविरुद्ध यापूर्वी पुणे जिल्ह्यामध्ये चोरीचे ५ गुन्हे दाखल आहेत. सदर आरोपी व जप्त केलेला मुद्देमाल पारनेर पोलीस स्टेशनच्या ताब्यात पुढील तपासासाठी देण्यात आलेला आहे.

एनटीव्ही न्यूज मराठी, अहिल्यानगर