वर्धा एलसीबीची मोठी कारवाई; नाकेबंदी करून १५० पेट्या देशी दारूसह २२ लाखांचा मुद्देमाल जप्त..!

• सावंगी मेघे परिसरात ‘प्रो-रेड’; धुळ्याचा मुख्य सूत्रधार फरार, चालकाला बेड्या..!

वर्धा प्रतिनिधी | दि. २३ जानेवारी

वर्धा: वर्धा जिल्ह्यामध्ये अवैध दारू तस्करांविरुद्ध स्थानिक गुन्हे शाखेने (LCB) मोठी मोहीम उघडली आहे. तुळजापूर हायवेवरून वर्ध्यात येणारा देशी दारूचा मोठा साठा पोलिसांनी नाकेबंदी करून पकडला असून, या कारवाईत वाहन आणि दारूसह एकूण २२ लाख १० हजार रुपयांचा मुद्देमाल जप्त करण्यात आला आहे.

गुप्त माहिती अन् थरारक नाकेबंदी

स्थानिक गुन्हे शाखेचे पथक सावंगी (मेघे) परिसरात गस्तीवर असताना, गोपनीय बातमीदाराकडून माहिती मिळाली की, एका बोलेरो पिकअपमधून मोठ्या प्रमाणात दारूची तस्करी होत आहे. या माहितीच्या आधारे पोलिसांनी तात्काळ पंछी धाब्याजवळ सापळा रचून नाकेबंदी केली.

संशयास्पद बोलेरो पिकअप (क्र. MH 52 0026) अडवून तपासणी केली असता, त्यात घरगुती सामानाच्या आड लपवलेला दारूचा साठा मिळून आला.

जप्त केलेला मुद्देमाल (तपशील)

आरोपी आणि मुख्य सूत्रधार

पोलिसांनी घटनास्थळावरून वाहनचालक राहुल प्रकाश पवार याला ताब्यात घेतले आहे. त्याची सखोल चौकशी केली असता, हा माल धुळे जिल्ह्यातील मुकटी येथील भूषण पाटील याने पाठवल्याचे समोर आले. सध्या मुख्य आरोपी भूषण पाटील फरार असून पोलीस त्याचा शोध घेत आहेत. या दोघांविरुद्ध सावंगी मेघे पोलीस ठाण्यात गुन्हा दाखल करण्यात आला आहे.

पोलीस दलाची कामगिरी

ही यशस्वी कारवाई वर्ध्याचे पोलीस अधीक्षक श्री. सौरभ कुमार अग्रवाल आणि अपर पोलीस अधीक्षक सदाशिव वाघमारे यांच्या मार्गदर्शनाखाली स्थानिक गुन्हे शाखेचे पोलीस निरीक्षक विनोद चौधरी, पोउपनि प्रकाश लसूण्ते, अंमलदार शेखर डोंगरे, विकास मुंडे, सुगम चौधरी, शुभम राऊत आणि राहुल लुटे यांनी केली आहे.

प्रतिनिधी जावेद खान, वर्धा